Jeti tomdyq «Aıtys» jınaǵynyń tusaýy kesildi (FOTO)
ASTANA. QazAqparat - Búgin QR Ulttyq akademııalyq kitaphanasynda «Nur Otan» partııasynyń qoldaýymen «Qazaq óneriniń antologııasy» jobasy aıasynda jaryq kórgen qazaq aıtysynyń 7 tomdyq kitabynyń tusaýy kesildi. Bul shara 5 jeltoqsanǵa josparlanǵan, jyl saıyn dástúrli túrde ótkizilip kele jatqan «Altyn dombyra» respýblıkalyq aıtysyna oraılastyrylyp uıymdastyryldy.
«Jeti tomdyq «Aıtys» jınaǵynyń eń basty ereksheligi - birinshi ret qazaqtyń kóne aıtystarynan bastap osy zamanǵy aıtystarǵa deıin barlyǵynyń basy qosylǵan. Sonymen qatar aqyndar týraly málimetter, túsindirme sózdikter bar. Sondaı-aq tuńǵysh ret sheteldegi qandastarymyzdyń aıtystary enip otyr. Onyń ishinde «Qytaıdaǵy qazaq aqyndary» degen úlken bólim bar. Qazirgi kezde qytaıdaǵy qazaq aqyndarynyń erekshelikteri óte kóp. Óıtkeni olar áýelgi qalpyn saqtap, sózdi qýalap, ýájben aıtysatyn, birin-biri sózben jyǵýǵa tyrysatyn, saıasattan tysqary jekpe-jekter ótkizedi, sondyqtan olardyń da «Aıtys - sóz barymtasy» (M. Áýezov) degen anyqtamaǵa jaýap beretin úlgileri kitapta jaryq kórdi», - deıdi qoǵam qaıratkeri Júrsin Erman. Onyń aıtýynsha, kitapqa odan basqa qazirgi aıtystardyń ishinen eń tańdaýlylary iriktelip alyndy. «Qazir qazaq aıtysynyń kemeline kelgen kezi. Aıtyskerlerdiń jańa tolqyny, jańa legi sońǵy 15-20 jyldyń kóleminde kórkem, ádemi aıtystar jasasa, sonyń báriniń mátinin qaǵazǵa túsirip, jınaqqa engizdik. Bul - «Babalar sózinen» keıingi halyqqa úlken serpilis beretin, lázzat tapqyzatyn óte qundy kitap», - dedi J.Erman. Atalmysh toptamalyq kitapty QR Mádenıet jáne sport mınıstrliginiń «Ádebıettiń áleýmettik mańyzdy túrlerin basyp shyǵarý» baǵdarlamasy boıynsha Qazaq ulttyq óner ýnıversıtetiniń Qorqyt atyndaǵy ǵylymı-zertteý ınstıtýty daıyndap, jaryqqa shyǵardy. Kitaptardy kórkem bezendirip, oqyrman qaýymǵa usynǵan - «Kúltegin» baspasy. Aıta keteıik, «Qazaq óneriniń antologııasy» jobasy 25 tom eńbekti quraıdy. Bul joba boıynsha bıyl 7 tom eńbek jaryq kórse, jalǵasy aldaǵy jyldary shyǵarylady dep kútilýde. Joba avtory - memleket jáne qoǵam qaıratkeri, fılologııa ǵylymdarynyń doktory, professor Myrzataı Joldasbekov.
