Jeti óńirde egis naýqany júrip jatyr – vıtse-mınıstr
«Memleket basshysy kóktemgi dala jumystaryn ońtaıly merzimde júrgizý úshin jaǵdaı jasaýdy tapsyrdy. Bul tapsyrmanyń oryndalýy mınıstrlik, ákimdik deńgeıinde júzege asyrylýda. Karantınge qaramastan, aýyl sharýashylyǵy taýar óndirýshileri kóktemgi dala jumystarynyń merzimin saqtaýda. Egis naýqany búginde jeti óńirde júrgizilýde. Elimizdiń ońtústik óńirlerinde jazǵy egis alqaby - 16%-dan 80%-ǵa deıin. Jambyl oblysynda - 326 000 ga, Almaty oblysynda - 239 000 ga, Túrkistan oblysynda - 230 000 ga, Qyzylorda oblysynda - 28 000 ga egis alqaby bar, al ózge óńirlerde egis jumystary bastalý satysynda tur», - deıdi QR Aýyl sharýashylyǵynyń birinshi vıtse-mınıstri Aıdarbek Saparov.
Onyń aıtýynsha, Batys Qazaqstan, Pavlodar jáne Atyraý oblystary egin egýdi bastady.
«24 sáýirdegi jaǵdaı boıynsha respýblıkanyń qalǵan óńirlerinde egis aldyndaǵy jumystar júrgizilýde. Óńirler arzandatylǵan janar-jaǵarmaımen, tuqymmen jáne tyńaıtqyshpen qamtamasyz etilgen. Tehnıka daıyn. Egis jumystary buryn sońdy bolmaǵan karantın jaǵdaıynda ótkizilip jatyr. Azamattardyń júrip-turýyn shekteýge baılanysty blokposttan ótý qıyndyǵyna qatysty fermerlerden kóptegen shaǵym kelip tústi. Aýyl sharýashylyǵy mınıstrligi sharýalardyń júrip-turý algorıtmin ázirledi. Ol memlekettik komıssııanyń 17 sáýirdegi otyrysynda maquldandy. Bul algorıtm ákimderge jetkizildi», - deıdi ol.