Jeti memlekettiń ókilderi toǵyzqumalaqtan baq synaý úshin Qazaqstanǵa keldi
QYZYLORDA. QazAqparat- Búgin Syrdarııa aýdanynda memleket jáne qoǵam qaıratkeri Nálqoja Ergeshbaevty eske alýǵa arnalǵan toǵyzqumalaqtan halyqaralyq týrnır bastaldy, dep habarlady QazAqparat HAA tilshisi.
Bıyl 10-shy márte ótip jatqan týrnırge Reseı, Ázerbaıjan, Ózbekstan, Qyrǵyzstan, Tájikstan, Túrkimenstan, Túrkııa jáne Qazaqstannan 14 jasqa deıingi uldar, qyzdar jáne erler men áıelder qatysýda. Týrnır shveıtsar júıesi boıynsha 9 týrdan ótedi.
Nálqoja Aqbalauly Ergeshbaev aýdannyń áleýmettik-ekonomıkalyq damýynda iz qaldyrǵan belgili qoǵam qaıratkeri. Elge adal qyzmet istegen azamat "Lenın", "Eńbek Qyzyl Tý", "Qurmet belgisi" ordenderimen marapattaldy. Búginde kent pen aýyldardaǵy mektepter, mádenıet úıleriniń birqatary bir kezderi osy aýdandy basqarǵan Nálqoja Aqbalaulynyń bastamasymen salyndy. Esimi el jadynda qalǵan azamatty kúlli syrdarııalyqtar erekshe qurmet tutady.
Jarysta álem chempıondary Nurbek Qabıev, Dıana Kenına (Aqtóbe), Ǵalymjan Temirbaev (Astana), Ásel Dálıeva, Saltanat Saparbekova (OQO) jáne Hákimjan Eleýsinovter (Qyzylorda) baq synasady.
Jarys 5 naýryz kúni máresine jetedi.
