Jeti kúnde kólikti mas kúıinde basqarǵan 800-ge jýyq adam ustaldy - ІІM

NUR-SULTAN. QazAqparat – Jeti kúnde Qazaqstanda avtokólikpen jyldymdyqty asyryp júrýdiń 7,5 myń faktisi tirkeldi. Bul týraly QR Іshki ister mınıstrliginiń resmı ókili Nurdildá Oraz aıtty, dep habarlaıdy QazAqparat tilshisi.

«Joldaǵy qaýipsizdikti qamtamasyz etý úshin jol erejesin óreskel buzý jaǵdaılarynyń aldyn alý is-sharalary kúsheıtildi. Óıtkeni bul faktiler apattylyq ahýalyna qatty áser etedi. Operatsııany ótkizý kezeńinde avtokólikti mas kúıde basqarýdyń 796 faktisi anyqtaldy. Sonymen qatar, jyldamdyqty asyrýdyń 7,5 myń faktisi tirkeldi», - dedi N. Oraz aptalyq onlaın brıfıngide.

Budan buryn habarlanǵandaı, resmı ókil jeti kúndik «Quqyqtyq tártip» jedel aldyn alý is-sharasy aıaqtalǵanyn jetkizdi.