Jeti adam birigip kisi óltirgeni úshin sottaldy - Qyzylorda oblysy
QYZYLORDA. QazAqparat - Qyzylorda oblysynyń qylmystyq ister jónindegi mamandandyrylǵan aýdanaralyq soty jeti adamǵa qatysty sot úkimin shyǵardy. Olardyń biri adam óltirgeni, endi biri atys qarýyn zańsyz alyp júrgeni úshin, al ekeýi osy adamdy óltirýge kómekteskeni úshin jáne taǵy biri atys qarýyn zańsyz saqtaǵany úshin, al ekeýi qylmystyń jasalǵany týraly habarlamaǵany úshin sottaldy. Bul týraly oblystyq qylmystyq ister jónindegi mamandandyrylǵan aýdanaralyq sotynyń baspasóz qyzmeti habarlady.
Olar jaldamaly páterde alkogoldi ishimdik iship otyryp, buzaqylyq nıetpen jábirlenýshini qasaqana atys qarýymen atyp óltirý týraly kelisimge kelgen. Osy josparlaryn júzege asyrý úshin olar jábirlenýshiniń úıine barǵan. Bireýi syrttan bógde adamdardyń kelip qalmaýyn baqylaý úshin avtokóliktiń ishinde qalsa, oqtalǵan sholaq myltyqpen qarýlanǵan ekeýi jáne qarýsyz bireýi úıdiń kire berisiniń 2 qabatyna kóterilip, odan ári jospar boıynsha qarýsyzy páterdiń esigin qaqqan. Úı ıesine esiktiń syrtynda turyp, ózin «Maqsatpyn» dep jalǵan esimmen tanystyryp, jábirlenýshini shaqyryp jiberýdi suraǵan. Páter ıesi ulyn uıyqtap jatqan jerinen oıatyp, tanysynyń kelip turǵanyn aıtqan kezde, sońǵy ornynan turyp, páterdiń kire beris syrtqy esigin ashqan. Sol sátte qarýlanǵan bireýi qolyndaǵy sholaq myltyqpen marqumnyń ish tusynan 1,5 m. qashyqtyqtan bir márte oq atyp, oqıǵa ornynan boı tasalaǵan.
Sottalýshylar basty sot otyrysynda aıyptaryn biri moıyndap, ekinshisi ishinara moıyndasa, keıbireýi aıybyn moıyndamady, jaýapkershilikten qashqysy keldi. Alaıda olardyń kinálary kýágerlerdiń jaýaptarymen, saraptama qorytyndylarymen tolyq dáleldendi.
Sot tórt sottalýshyǵa 16, 14, 11 jáne 10 jylǵa bas bostandyǵynan aıyrý jazasyn taǵaıyndap, jazalaryn qatań rejimdegi túzeý kolonııasynda óteýge úkim kesti.
Qalǵan úsh sottalýshynyń birine qatysty zańsyz qarý saqtaǵany úshin 3 jylǵa bas bostandyǵyn shekteý jazasy qoldanylsa, al qalǵan ekeýi qylmystyń bolǵanyn jasyryp, habarlamaǵany úshin QR QK-niń 364-babymen kináli dep tanylyp, olarǵa 200 aılyq eseptik kórsetkish mólsherinde aıyppul salyndy.
Úkim zańdy kúshine engen joq.
