Jetekshi sarapshy-jýrnalıster klýbynyń mańyzy zor - vıtse-mınıstr Ǵ.Telebaev
;ASTANA. Qarashanyń 17-si. QazAqparat /Quralaı Orynbekqyzy/ - Búgin QR Ulttyq akademııalyq kitaphanasynda jetekshi sarapshy-jýrnalıster klýbyn qurý týraly jobasy tanystyryldy,
dep habarlaıdy QazAqparat tilshisi.
«Men búgin eki joba usynǵym keledi. Biri - jetekshi sarapshy-jýrnalıster klýbyn qurý týraly erejesiniń jobasy bolsa, ekinshisi - onyń quramy týraly joba. Atalmysh klýb eń aldymen, Qazaqstan halqy Assambleıasynyń ortaǵa salǵysy kelgen máselelerin jurtshylyq úshin, barsha qazaqstandyqtar úshin barynsha túsinikti etip jarııalaý úshin qajet. Bul sondaı-aq biz úshin de, elimizdiń aqparattyq alańy úshin kerek dúnıe. Biz búgin klýb erejesin de, onyń quramyn da qabyldaýdy usynbaımyz. Óıtkeni, bul másele ortaǵa salynyp, jan-jaqty talqylanylýy tıis. Jýrnalıster klýbynyń mańyzy zor», - dep atap ótti QR Mádenıet jáne aqparat vıtse-mınıstri Ǵazız Telebaev.
Ereje jobasynda aıtylǵandaı, atalmysh klýb Qazaqstan halqy Assambleıasynyń janyndaǵy turaqty jumys isteıtin keńestik-saraptyq jáne aqparattyq organ bolyp tabylady. Klýb óz qyzmetinde QR Konstıtýtsııasyn, «Qazaqstan halqy Assambleıasy týraly», «Buqaralyq aqparat quraldary týraly» zańdaryn jáne ózge de QR zańdary men QR Prezıdentiniń aktilerin basshylyqqa alady.
