Jetekshi memlekettik aqparat quraldary men baılanys salasynyń kompanııalary Elbasynyń alǵys hattaryn aldy
ASTANA. 8 jeltoqsan. QazAqparat /Muratbek Maqulbekov/ - Búgin Astanada, Mınıstrler úıinde Baılanys jáne aqparat mınıstri Asqar Jumaǵalıev Eýropadaǵy qaýipsizdik jáne yntymaqtastyq uıymynyń sammıtin uıymdastyrýǵa belsendi atsalysqan baılanys salasynyń kompanııalary men aqparat quraldaryna Elbasynyń atynan alǵys hattar tabys etti.
Osyndaı alǵys hat «Qazaq aqparat agenttigi» Ulttyq kompanııasy» aktsıonerlik qoǵamynyń basqarma tóraǵasy Dáýren Dııarovqa tabys etildi.
Sondaı-aq, «Telekommýnıkatsııa salasyndaǵy tehnıkalyq súıemeldeý jáne taldaý jasaý ortalyǵy» RMK, «Habar» agenttigi» AQ, «Qazaqstan» teleradıokorporatsııasy» AQ, «Egemen Qazaqstan» respýblıkalyq gazeti» AQ, «Kazahstanskaıa pravda» respýblıkalyq gazeti» AQ, «Qazaqstan telekommýnıkatsııasy» AQ (KATELKO), «Qazteleradıo» AQ, «Nur Medıa» JShS, «7 arna», «Rahat TV» JShS («STV»), «KTK» AQ, «Qazaqtelekom» AAQ-nyń «GSM Qazaqstan» kompanııasy (Ksell); «KarTel» JShS, «Qazaqtelekom» AQ sııaqty kompanııalardyń basshylary da alǵys hattar aldy.
«2010 jyly 1-2 jeltoqsanda Astanada ótken Eýropadaǵy qaýipsizdik jáne yntymaqtastyq uıymynyń sammıtin daıyndaýǵa jáne ony ótkizýge belsendi atsalysqandaryńyz úshin alǵysymdy bildiremin» delingen Elbasynyń alǵys hatynda.
Mınıstr A.Jumaǵalıev óz atynan sondaı-aq, EQYU Sammıtin jurtshylyqqa keńinen tanystyrǵan atalǵan kompanııalardyń ujymdaryna alǵys hattar tabys etti.
