Jetekshi ıslamdyq bankter «Astana» HQO alańyna kelýge daıyn
ASTANA. QazAqparat - Jetekshi ıslamdyq bankter «Astana» halyqaralyq qarjy ortalyǵy alańyna kelýge daıyn. Bul týraly búgin elordada ótip jatqan «Qazaqstandyq qor naryǵyna halyqaralyq kapıtal tartý» halyqaralyq konferentsııasynda «Astana» HQO-nyń basqarýshysy Qaırat Kelimbetov aıtty, dep habarlaıdy QazAqparat.
«Taıaýda ǵana biz ıslamdyq qarjylandyrý sektorynyń qarqyndy damyp kele jatqandyǵyn aıtqan edik. Astana postkeńestik keńistikte ıslamdyq qarjylandyrýdyń qarlyǵashy ári ózindik kóshasbasshysy bolady. Qazirdiń ózinde Malaızııanyń, Taıaý Shyǵystyń, eń aldmen Parsy shyǵanaǵy elderiniń ıslamdyq qarjylandyrýdaǵy jetekshi ınstıtýttarymen jaqsy ýaǵdalastyǵymyz bar. Olar jańa alańǵa kelýge daıyn», - dedi Qaırat Kelimbetov.
Esterińizge sala ketsek, qazirgi ýaqytta elimizde «Al Hilal» Islam banki jumys isteýde. Sonymen qatar Qazaqstan Islam damý bankimen de belsendi yntymaqtastyqty jolǵa qoıǵan.
Aıta keteıik, 2015 jyldyń 5 qarashasynda QR Parlamentiniń Senaty «Astana» halyqaralyq qarjy ortalyǵy týraly» QR Konstıtýtsııalyq zańdy qabyldady. Atalǵan zań «100 naqty qadam» Ult josparyn iske asyrý sheńberinde «Astana» halyqaralyq qarjy ortalyǵyn qurý, kapıtal naryǵyn jáne ıslamdyq qarjylandyrýdy damytý jónindegi Memleket basshysynyń tapsyrmasyn oryndaýdy kózdeıdi. Parlament qabyldaǵan zań «Astana» halyqaralyq qarjy ortalyǵy dál belgilegen shekaralary bar, Astana qalasynyń shegindegi aýmaqty bildiredi.
Ortalyqtyń aýmaǵynda óziniń zańnamasy bolýy yqtımal, erekshe quqyqtyq rejım qoldanylatyn bolady. Halyqaralyq qarjy ortalyǵynyń qoldanystaǵy quqyǵy qabyldanyp otyrǵan konstıtýtsııalyq zańnan, Anglııa jáne Ýels quqyǵynyń qaǵıdattaryna, normalary men pretsedentterine negizdelgen aktilerden, sondaı-aq rettelmegen bólikte qoldanylatyn Qazaqstan Respýblıkasynyń qoldanystaǵy quqyǵynan turady.
Zańnamaǵa sáıkes, Ortalyqty basqarý jónindegi keńes Qazaqstan Respýblıkasynyń Prezıdenti basqaratyn, turaqty jumys isteıtin alqaly organ qurylady. Onyń quzyretine Ortalyqtyń damý strategııasyn aıqyndaý, qaýlylar túrindegi Ortalyqtyń aktilerin qabyldaý jatady. Ortalyq ákimshiligi, Ortalyqtyń qarjylyq qyzmetterdi kórsetýdi retteý jónindegi komıteti, Ortalyq soty jáne basqa da qajetti organdar qurylýy múmkin. Erekshe tartymdy jaǵdaılar jasaý maqsatynda Ortalyqta ózgeshe salyqtyq, valıýtalyq, vızalyq rejım, sondaı-aq sheteldik jumys kúshin tartýdyń rejımi kózdelgen
Osylaısha, salyq salý bóliginde ortalyqtyń organdary men qatysýshylaryn 2066 jylǵy 1 qańtarǵa deıin elý jylǵa korporatıvtik tabys salyǵyn, múlik salyǵyn jáne jer salyǵyn tóleýden bosatý belgilengen. Budan basqa, sheteldik qyzmetkerler jeke tabys salyǵyn tóleýden bosatylady.
Aıta keterligi «Astana» halyqaralyq qarjy ortalyǵynyń resmı tili aǵylshyn tili bolyp tabylady. Jekelegen máseleler boıynsha qazaq nemese orys tiline aýdarýǵa jol beriledi.
