Jetibaıdaǵy jumyssyzdyqty Samuryq-Qazyna men QazMunaıGaz ýshyqtyryp otyr – depýtat
Májilis depýtaty Samat Musabaev Úkimet basshysyna Prezıdent Qasym-Jomart Toqaevtyń Mańǵystaý óńirine baılanysty tapsyrmalary oryndalmaı jatqanyn aıtyp, úkimettiń bul baǵyttaǵy jumysyn sabotajǵa teńedi, dep habarlaıdy Kazinform.
«Memleket basshysynyń tapsyrmalary mirdiń oǵyndaı tez, ýaqtyly ári buljytpaı oryndalýy kerek dep esepteımiz. Qasym-Jomart Toqaev Mańǵystaý óńirine barǵan saparlarynda qordalanǵan máseleler boıynsha 34 qajetti naqty tapsyrma bergen bolatyn. Osy tapsyrmalar boıynsha is-sharalar jospary bekitilgen. Búginde, sol tapsyrmalardyń kóbi oryndalmaı otyr», - dedi ol Premer-Mınıstrdiń atyna joldaǵan saýalynda.
Onyń sózinshe, Prezıdent tapsyrmasynan týyndaǵan 34 sharanyń 29-y qolǵa alynbaǵan.
«Siz 2023 jyly Mańǵystaý oblysynda bir emes, úsh ret issaparda bolǵanyńyzben, óńirde Prezıdent tapsyrmalarynyń oryndalysy mardymsyz. Búginde sol 34 tapsyrmanyń tek 5-eýi ǵana iske asyrylyp jatyr. Al qalǵan 29 is-shara toqtap tur. Onyń ishinde Ónerkásip jáne qurylys mınıstrligine berilgen 6 tapsyrma, «Samuryq-Qazynaǵa» qatysty 3 tapsyrma, «Báıterekke» berilgen jalǵyz tapsyrma, Ulttyq ekonomıka mınıstrliginde 7 tapsyrma, Aýyl sharýashylyǵy mınıstrliginde 2 tapsyrma oryndalmaǵan.», - dedi depýtat.
Samat Musabaev Jetibaıdaǵy jerlesteriniń jumyssyzdyq máselesine jeke toqtaldy.
«Aqtaý – Fort-Shevchenko, Taýshyq – Shetpe joldaryn jáne Quıylys-Aqtaý sý jelisin salý, týrızm úshin Kaspııdiń jaǵalaýyn damytý, jyr bolǵan Qoshqar Ata ýly qaldyqtar qoımasyn zalalsyzdandyrý sııaqty mańyzdy jobalar. Osylaı jalǵastyra berýge bolady.
Sondaı-aq, turyp qalǵan óndiristerdi jandandyrý týraly tapsyrmalar da iske aspady. Tipti jumyssyzdyq beleń alǵan Jetibaıda jumys istep turǵan armatýra shyǵaratyn tsehty «Samuryq-Qazyna» men «QazMunaıGazdy» kedergi keltirýi sebebinen toqtap tur. Bul Prezıdenttiń bıznesti qoldaý týraly bergen tapsyrmalaryna sabotaj emes pe», - dep surady depýtat.
Sondaı-aq, ol Úkimetten atalǵan olqylyqtardyń ornyn toltyrý úshin birneshe sharany qolǵa alýdy talap etti.
«Úkimet tarapynan ár tapsyrma boıynsha shuǵyl túrde memlekettik jáne kvazımemlekettik organdardyń basshylarynan esep alynsyn. Atqarylmaǵan tapsyrmalar boıynsha naqty sharalar iske asyrylsyn, bıýdjetten tıisti qarajat qarastyrylsyn. Toqsan saıyn atqarylǵan jumystar jóninde aqparat Májilistegi «Amanat» fraktsııasyna joldansyn, - dedi Samat Musabaev.
