Jetibaıda 9 myń tonna munaı qaldyǵy tógilgen aýmaq qaraýsyz qaldy
AQTAÝ. KAZINFORM – Mańǵystaý oblysynyń Jetibaı aýylynda «Ýralenergostroı» JShS qyzmetinen keıin qalǵan shamamen 9 myń tonna munaı qaldyǵy sot sheshimimen ıesiz múlik dep tanyldy. Endi aýmaqty tazartý jáne qalpyna keltirý máselesi qaralyp jatyr.
Oblystyq ekologııa departamentiniń málimetinshe, buǵan deıin kompanııaǵa munaı ónimderin qaıta óńdeý jáne jol-qurylys materıaldaryn óndirý úshin 6,0790 gektar jer ýchaskesi 49 jylǵa jalǵa berilgen.
Kásiporyn aýmaǵynda shamamen 8 myń tonna munaı qaldyǵy qaıta óńdelgen. Alaıda keıin kompanııa jaldaý sharty boıynsha mindettemelerin tıisti deńgeıde oryndamaǵan.
Sot jaldaý shartyn jaramsyz dep tanyp, «Ýralenergostroı» JShS-nen memleket paıdasyna ekologııalyq zalaldy óteý úshin 651,6 mln teńge óndirý týraly sheshim shyǵarǵan.
Sonymen qatar sot kompanııany aýmaqtaǵy salynǵan nysandardy buzyp, jer ýchaskesin bosatýǵa jáne tógilgen munaı ónimderi men qaldyqtardy tazartýǵa mindettedi.
Sot sheshimi zańdy kúshine engen. Alaıda bereshekti boryshkerden óndirip alý múmkin bolmaǵandyqtan, atqarýshylyq qujat qaıtarylǵan.
- Qazirgi ýaqytta aýmaqta qalǵan shamamen 9 myń tonna qaldyq tıisti aýdandyq bólimniń balansyna qabyldandy. Aýmaqty qalpyna keltirý úshin rekýltıvatsııa jobasyn ázirlep, zerthanalyq zertteýler júrgizý, sondaı-aq jobalaý-izdestirý jumystaryn oryndaý qajet. Alaıda bul maqsatqa aýdandyq bıýdjette qarajat qarastyrylmaǵan. Osyǵan baılanysty nysandy oblystyq kommýnaldyq menshikke berý máselesi qaralyp jatyr, - delingen habarlamada.
Buǵan deıin, Jańaózendegi gaz óńdeý zaýytyna ekologııalyq talaptardy buzǵany úshin aıyppul salynǵan edi.
