Jetibaı – Jańaózen tasjolynyń 114 shaqyrymynda jóndeý júrip jatyr
ASTANA. KAZINFORM – Mańǵystaý oblysynda respýblıkalyq mańyzy bar «Jetibaı – Jańaózen – Túrikmenstan shekarasy» avtomobıl jolynyń 65-179 shaqyrym aralyǵynda ortasha jóndeý jumystary jalǵasyp jatyr.
QazAvtoJol ulttyq kompanııasynyń málimetinshe, joba aıasynda 36,7 shaqyrym aýmaqta asfaltbeton jabyny jonylǵan.
Sonymen qatar 35,8 shaqyrym jolǵa iri túıirshikti asfaltbeton qospasynan tómengi qabat tóseldi.
Nysanda qazirgi ýaqytta 23 birlik arnaıy tehnıka men 48 maman jumys istep jatyr.
«Jóndeý jumystary bekitilgen óndiristik josparǵa sáıkes júrgizilýde», – dep habarlady jaýapty mekeme.
Atalǵan joba jol jabynynyń sapasyn jaqsartýǵa, qozǵalys qaýipsizdigin arttyrýǵa jáne kólik qatynasynyń qolaılylyǵyn qamtamasyz etýge baǵyttalǵan.
Aıta keteıik, Aqmola oblysynda 65 shaqyrym jol jóndelip jatyr.
