Jetibaı — Jańaózen — Kendirli joly jańartylady: jol júrý ýaqyty 8 saǵattan 2,5 saǵatqa qysqarady
ASTANA. KAZINFORM — Mańǵystaý oblysynda Jetibaı — Jańaózen — Kendirli — Túrikmenstan shekarasy avtojolynyń 50 shaqyrymynda kúrdeli jóndeý júrip jatyr. Joba aıaqtalǵan soń jol júrý ýaqyty 5–8 saǵattan 2–2,5 saǵatqa deıin qysqarýy múmkin. Bul týraly QazAvtoJol kompanııasy málim etti.
Jol kompanııasynyń málimetinshe, Mańǵystaý oblysynda respýblıkalyq mańyzy bar «Jetibaı — Jańaózen — Kendirli — Túrikmenstan shekarasy» avtomobıl jolynyń 179–229 shaqyrymdary aralyǵynda kúrdeli jóndeý jumystary júrgizilýde. Jobaǵa 132 birlik arnaıy tehnıka men 198 maman jumyldyrylǵan.
— Qazirgi ýaqytta ýchaskede negizgi jumystardyń basym bóligi oryndaldy. Atap aıtqanda, 50 shaqyrymda jer jumystary júrgizilip, geotekstıl, qıyrshyqtas-qum qospasy jáne qara qıyrshyqtas tóseldi. Sonymen qatar 47 shaqyrymǵa iri túıirshikti asfaltbetonnan tómengi jabyn qabaty salyndy, — delingen habarlamada.
Bul jol ýchaskesin jańǵyrtý Qazaqstannyń Túrikmenstan men Iran baǵytyndaǵy tranzıttik áleýetin arttyrýǵa, sondaı-aq Kendirli kýrorttyq aımaǵynyń damýyna serpin berýge baǵyttalǵan.
Aıta ketý kerek, atalǵan ýchaskede asfaltbeton jabyny alǵash ret 1988–1990 jyldary jol qurylysy kezinde tóselgen. Sodan beri bul aýmaqta kúrdeli jóndeý jumystary júrgizilmegen.
Joba tolyq aıaqtalyp, paıdalanýǵa berilgennen keıin jol júrý ýaqyty eki ese qysqarmaq. Buǵan deıin tranzıttik jáne aýyr júk kólikteri joldyń osy kúrdeli bóligin 5–8 saǵatta júrip ótse, jańartylǵan jolmen bul ýaqytty 2–2,5 saǵatqa deıin qysqartý josparlanýda.
Sonymen qatar dálizdiń ótkizý qabileti men tranzıttik áleýeti eki esege artady dep kútilýde. Bul Qazaqstan men Túrikmenstan arasyndaǵy saýda-ekonomıkalyq baılanystardy nyǵaıtýǵa, júk tasymalynyń tıimdiligin arttyrýǵa múmkindik beredi.
Jańartylǵan jol Túrikmenstannan keletin júk tasymaldaýshylar úshin Mańǵystaý oblysynyń negizgi kólik toraptaryna Jetibaı arqyly tikeleı shyǵýdy qamtamasyz etip, port ınfraqurylymyna qatynaýdy ońtaılandyrýǵa yqpal etedi.
Aıta keteıik, Shyǵys Qazaqstanda bıiktigi 45 metrlik Pıhtovka kópiri paıdalanýǵa berilip, Óskemen – Altaı baǵytyndaǵy 28 shaqyrym jol qaıta jańǵyrtyldy. Jańa jol Osınov asýynyń qaýipti burylystaryn aınalyp ótýge múmkindik beredi.
