Jeti partııa, bir alań: «Basty debat — 2026» qatysýshylarynyń kezegi anyqtaldy
ASTANA. KAZINFORM — Búgin «24KZ» telearnasynda «Basty debat — 2026» televızııalyq pikirtalasyna qatysatyn saıası partııalardyń sóz sóıleý kezegin anyqtaý úshin jerebe tartý rásimi ótti, dep habarlaıdy 24.kz.
Jerebe basty teledebatqa bir kún qalǵanda, saǵat 10:00–de «24KZ» telearnasynyń tikeleı efırinde uıymdastyryldy. Nátıjesinde jeti saıası partııanyń debat barysynda sóz sóıleý reti aıqyndaldy.
Jerebe tartý rásimine qatysqan saıası partııalardyń ókilderi:
1. «Ádilet» partııasy — Lázzat Chınkısbaeva, «Ádilet» partııasynan Quryltaı depýtattyǵyna úmitker;
2. Jalpyulttyq sotsıal-demokratııalyq partııasy (JSDP) — Maqsut Nasıbýlov, partııanyń ortalyq apparatynyń jetekshisi;
3. «Baıtaq» jasyldar partııasy — Narıman Baýbek, «Baıtaq» partııasynan Quryltaı depýtattyǵyna úmitker;
4. Qazaqstan Halyq partııasy (QHP) — Beıbit Qusaıynov, partııa tóraǵasynyń orynbasary;
5. «Aýyl» partııasy — Shahmardan Baımanov, partııa tóraǵasynyń orynbasary — apparat basshysy;
6. «Aq jol» demokratııalyq partııasy — Asylhan Qojahmetov, partııanyń respýblıkalyq shtabynyń jetekshisi;
7. Respublica partııasy — Janat Iskakov, partııa tóraǵasynyń orynbasary — Ortalyq apparat jetekshisi.
Jerebe nátıjesine sáıkes saıası partııalardyń sóz sóıleý kezegi tómendegideı bolady:
1. «Respublica»
2. «Baıtaq»
3. «Aq jol»
4. «Ádilet»
5. «Aýyl»
6. JSDP
7. Qazaqstan Halyq partııasy
Jerebe tartý rásimi «24KZ» telearnasynyń YouTube, Instagram, Facebook jáne TikTok jelilerindegi resmı paraqshalarynda tikeleı kórsetilip, jerebe nátıjeleri jarııalanady.
Esterińizge sala keteıik, 19 tamyz kúni saǵat 20:00–de «24KZ» telearnasynyń tikeleı efırinde «Basty debat — 2026» televızııalyq pikirtalasy ótedi. Bul — el tarıhyndaǵy alǵash Quryltaı saılaýy allyndaǵy sońǵy teledebat. Basty teledebatta jeti partııanyń kóshbasshysy bir alańda bas qosady. Saıası pikirtalastyń negizgi taqyryby — «Damyǵan ekonomıka — qýatty qoǵam». Debat moderatorlary — belgili telejúrgizýshiler Nursultan Qurman men Móldir Dosbaı. Azamattardan kelip túsetin saýaldardy baılanys ortalyǵy arqyly Saǵynysh Ábikeı qabyldaıdy.
Buǵan deıin 12 tamyzda Jibek Joly telearnasynyń tikeleı efırinde Quryltaı depýtattaryn saılaýǵa qatysatyn jeti saıası partııa ókilderiniń debaty ótkenin jazǵanbyz. Qatysýshylar «Zań men tártip — Ádiletti Qazaqstannyń negizi» taqyrybynda sóz sóılep, saılaýaldy baǵdarlamasyn tanystyrdy.
