Jeti óńirde orman órti shyǵý qaýpi joǵary – Ekologııa mınıstrligi

ASTANA. KAZINFORM — Elimizdiń 7 oblysynda qaraǵaıly ormandarda órt shyǵý qaýpi joǵary. 

Bul týraly Ekologııa jáne tabıǵı resýrstar mınıstrligi orman sharýashylyǵy jáne janýarlar dúnıesi komıteti tóraǵasynyń orynbasary Maqsat Elemesov málim etti.

— Soltústik Qazaqstan oblysyndaǵy qaıyńdy japyraqty orman janǵanda, ot tek tómennen taraıdy, joǵaryǵa ótpeıdi. Sondyqtan mundaı órt orman qory úshin asa qaýip týdyrmaıdy. Al qaraǵaıly, qylqan japyraqty ormandaǵy órt, biraz aýmaqty sharpýy múmkin, bul ormannyń joıylýyna ákeletin qaýip, — dedi Maqsat Elemesov ortalyq kommýnıkatsııalar qyzmeti alańynda ótken baspasóz máslıhatynda.

Komıtet tóraǵasy orynbasarynyń aıtýynsha, qazir 7 oblysta tabıǵı órt qaýpi joǵary.

Sondaı-aq mınıstrlik ókiliniń málimdeýinshe, elimizdiń orman qory órt qaýpi bar aımaqta ornalasqan. Eń úlken qaýip týǵyzatyn — qylqan japyraqty ormandar, sebebi ol jerde ottyń órshýi ońaı júredi.

— Búginde shamamen 7 oblysta, atap aıtqanda Shyǵys Qazaqstan, Abaı, Pavlodar, Qostanaı, Aqmola, Almaty jáne Qaraǵandy oblysy órt qaýpi joǵary aımaq bolyp otyr. Barlyǵy da qaraǵaıly orman alqaby bar óńirler, — dedi Maqsat Elemesov.

Buǵan deıin Semeı ormanyndaǵy alapat órtten keıin qorǵaý júıesi qalaı kúsheıtilgeni týraly jazǵan edik.