Jeti oqýshy kúıip qaldy: polıtsııa qylmystyq is qozǵady

PAVLODAR. KAZINFORM - Polıtsııa Pavlodardaǵy №37 orta mektebinde bolǵan jazataıym oqıǵa boıynsha qylmystyq is qozǵalǵanyn málim etti.

- Balalardyń ómiri men densaýlyǵynyń qaýipsizdigin qamtamasyz etý jónindegi mindetterdi tıisinshe oryndamaý deregi boıynsha qylmystyq is qozǵaldy. Sonymen qatar, kámeletke tolmaǵandardyń jáne olardyń ata-analarynyń áreketteri Kámeletke tolmaǵandardyń isteri jáne olardyń quqyqtaryn qorǵaý jónindegi komıssııa otyrysynda qaralady. Budan bólek, tergeý barysynda oqý orny ákimshiliginiń is-áreketterine quqyqtyq baǵa beriletin bolady, - dep málimdedi óńirlik polıtsııa departamentiniń baspasóz qyzmetinen.

Tártip saqshylary oqıǵanyń mán-jaıy men sebepteri tergeý barysynda anyqtalatynyn jetkizdi.

Al oblystyq bilim berý basqarmasy mektep pedagogy pen mektep ákimshiligine qatysty sheshim tergeý amaldary aıaqtalǵannan keıin qabyldanatynyn habarlady.

- Qazirgi ýaqytta tergeý áreketteri júrgizilýde. Mektepke tyıym salynǵan zattardy alyp kirý deregi boıynsha zańdy ókilderge qatysty tekserý jumystary atqarylyp jatyr. Zardap shekkender der kezinde oblystyq balalar aýrýhanasyna jetkizildi. Densaýlyq saqtaý basqarmasynyń málimetinshe, naýqastardyń jaǵdaıy aýyr emes, - delingen basqarmanyń resmı aqparynda.

Eske sala keteıik, Pavlodarda dene shynyqtyrý sabaǵy kezinde 7 oqýshy kúıip qaldy.