Jeti eldiń volonterleri Balqash kóliniń jaǵalaýyn tazartty
QARAǴANDY. KAZINFORM — Balkhash Tour Fest festıvaliniń ekinshi kúni kontsertter men sporttyq jarystardan emes, tabıǵatqa degen janashyrlyqtan bastaldy, dep habarlaıdy Qaraǵandy oblysy ákimdiginiń baspasóz qyzmeti.
Tańsáriden festıval qatysýshylary Balqash kóliniń jaǵalaýyn tazalaýǵa shyqty.
Ekologııalyq aktsııaǵa qazaqstandyq eriktilermen qatar jeti elden kelgen qonaqtar da belsendi qatysty. Birlese atqarylǵan jumys nátıjesinde olar 30-dan astam qap qoqys jınap, kól jaǵalaýyn tazartty.
Ekologııalyq shara «Taza Qazaqstan» ulttyq baǵdarlamasy aıasynda uıymdastyryldy. Bul bastama zamanaýı týrızmniń tek demalys pen saıahat qana emes, sonymen birge barǵan jerińniń tabıǵatyna degen jaýapkershilik ekenin taǵy bir márte kórsetti.
— Tańerteń erte ekologııalyq senbilikke shyqtyq. Bizben birge sheteldik volonterler de tazalyq jumystaryna atsalysty. Nátıjesinde 30-dan astam qap qoqys jınaldy. Qatysqanymyz úshin festıvaldiń estelik syılyqtaryn aldyq, — dedi Qaraǵandy qalasynan kelgen volonter Dinmuhammed Muqanǵalı.
Onyń aıtýynsha, mundaı sharalar ár eldiń jastaryn biriktirip, ortaq ıgi ister arqyly jańa dostar men pikirles adamdar tabýǵa múmkindik beredi.
Aıta keteıik, Balkhash Tour Fest festıvaliniń ekinshi kúni kól jaǵalaýynda júzdegen qatysýshyny jınady. Sharaǵa Balqashpen tanysyp qana qoımaı, onyń biregeı tabıǵatyn saqtaýǵa óz úlesin qosýǵa nıetti jeti eldiń volonterleri qatysyp jatyr.
