«Jeti aı boıy men únsiz júrdim» – Erbolat Janabylov sotta málimdeme jasady
ASTANA. KAZINFORM — Elordada bloger Erbolat Janabylov pen Elmıra Tólegenovaǵa qatysty qylmystyq is boıynsha sot protsesi jalǵasyp jatyr.
Kezekti sot tyńdalymy Erbolat Janabylovtyń jaýap berýinen bastaldy. Sot barysynda oǵan negizgi suraqtardy advokaty Gaýhar Aıtjanova qoıdy.
Bloger aldymen ózi satqan onlaın kýrstar týraly málimet berdi.
– Jubaıymmen Qytaıǵa birneshe ret baryp júrdik. Sebebi áıelim kosmetıka jáne toqyma bıznesimen aınalysty. Osy tájirıbege súıene otyryp, oqý kýrsyn ázirleýdi qolǵa aldyq. Bul rette bizge spıker Aset Akbar kómektesti. Kýrstyń negizgi maqsaty – barlyq protsesti qarapaıym ári túsinikti tilmen kórsetý. Tapsyrysty qalaı tez berý kerek, qandaı qadamdar jasaý qajet – barlyǵy telefon arqyly kezeń-kezeńimen kórsetilip, tolyq túsindiriledi. Al Suńǵat Ótebolatov tehnıkalyq jumystarǵa jaýap berdi: túsirilim júrgizip, montaj jasaýdy uıymdastyrdy, - dedi bloger.
Onyń aıtýynsha, «baraban sáttiligi» júıesin tehnıkalyq maman Sunǵat Ótebolatov ázirlegen. Bul júıege onyń kirý quqyǵy bolmaǵan.
– Meniń bul júıege kirý múmkindigim bolǵan joq. Sońǵy ret kompıýterdi, shamasy, 9-synypta paıdalanǵan shyǵarmyn. Sondyqtan utys nátıjesine áser etýge múmkindigim bolmady, – dedi Janabylov.
Sondaı-aq blogerdiń sózinshe, ol óz áriptesteriniń kýrs satyp, keıin ákimshilik jaýapkershilikke tartylǵanyn bilmegen.
– Men bul týraly bilmedim. Darhan Jolshybekovtiń storısterinde salyq tóleý qajet ekeni týraly aqparattar boldy. Sondaı-aq ınternette onyń salyq tólemegeni týraly úlken rezonans bolǵan edi. Men ony salyq tólemegeni úshin jaýapkershilikke tartylyp jatyr dep oıladym. Al lotereıa uıymdastyrǵany úshin ákimshilik aıyppul salynǵanyn bilmedim. Al Nurbek Nurtaza ákimshilik aıyppuldy bizdiń jaǵdaıdan keıin, qoǵamda rezonans týǵan soń tóledi, - dedi ol.
Osy tusta Janabylov ózimen uqsas jaǵdaıǵa tap bolǵan bloger Darhan Jolshybaevtyń tek ákimshilik jaýapkershilikke tartylǵanyn alǵa tartty. Al ózińe qatysty nege qylmystyq is qozǵalǵany túsiniksiz ekenin de jetkizdi.
– Darhan Jolshybaevtyń ózi de ákimshilik aıyppul salynǵanyn aıtqan. Ol sotqa ózi barmaǵan, onyń ornyna advokaty qatysqan, sondaı-aq apellıatsııalyq shaǵym berilgen. Ol da kinásin tolyq moıyndamaǵan. Biraq oǵan qatysty qylmystyq is qozǵalmaǵan. Mende de dál sondaı jaǵdaı boldy. Biraq maǵan qatysty qylmystyq is qozǵaldy. Zań bárine birdeı emes pe? Nege bir jaǵdaıda ákimshilik jaýapkershilik, al basqa jaǵdaıda – qylmystyq is? Álde munda qoǵamdyq rezonans áser etti me? - dedi Erbolat Janabylov.
Munan soń aıyptalýshy istiń alǵashqy sátinen bastap osy kúnge deıingi sot protsesterin tizbektep baıandady. Onyń pikirinshe, ol bastapqyda ákimshilik protseske qatysýdy josparlamaǵan. Sondaı-aq sotta sóz sóıleýge daıyn bolmaǵanyn jáne jaǵdaıdy tolyq túsinbegenin de jetkizdi.
– Biz sol ákimshilik sotqa bardyq, men tipti ol jerde sóıleıtinimdi bilmedim. Maǵan eshteńe aıtylǵan joq, men eshteńe túsinbedim, meni daıyndaǵan joq. Jeti aı boıy men únsiz júrdim, – dedi ol.
Aıta keteıik, 2025 jyly 11 avtokólikti utysqa qoıyp, kýrs satqan blogerler Erbolat Janabylov pen Elmıra Tólegenovanyń áreketi Qazaqstan Týrızm jáne sport mınıstrligi nazaryna ilikken bolatyn.
2025 jylǵy 26 tamyzda Erbolat Janabylovqa qatysty Ákimshilik quqyq buzýshylyq týraly kodeks boıynsha hattama toltyrylyp, is sotqa joldandy.
Al 2025 jylǵy 16 qazanda blogerlerge qatysty ákimshilik sıpattaǵy is qylmystyq óndiriske aýystyryldy.
Alaıda 13 naýryzda ótken aldyn ala sot tyńdalymynda Janabylovtardyń advokaty Gaýhar Aıtjanova isti prokýratýraǵa qaıtarýdy suraǵan. Sot bul ótinishti qanaǵattandyrýdan bas tartty.
Osy jyldyń 16 naýryzynda blogerlerge qatysty qylmystyq is boıynsha sot protsesi bastalyp, kýágerler sóz sóıledi.
Al 30 naýryz kúni ótken kezekti sot tyńdalymyna kýá retinde Almatydan bloger Darhan Jolshybekov pen Nurbek Nurtaza keldi.