Jerústi jáne jerasty ótkelderi jańa standart boıynsha jóndeledi – Almaty ákimi
ALMATY. KAZINFORM – Almatydaǵy jerasty jaıaý júrginshiler ótkelderi men jerústi ótkelderindegi lıftter men kótergish qurylǵylar jańa standartqa saı jóndeledi. Bul týraly Almaty ákimi Erbolat Dosaev Áýezov aýdany turǵyndarymen kezdesý barysynda málim etti.
Qala turǵyndarynyń biri jol ótkelderindegi kótergishterdiń jumys istemeıtiniń aıtyp, shaǵymdandy.
«Bizde búkil qalada kópirlerde kótergishter bar. Olardy kútip ustaýǵa jáne paıdalanýǵa aqsha bólinedi, biraq olar árdaıym jumys isteı bermeıdi. Kilt máselesi de bar. Qashan tártip ornatylady?», - dep surady ákimnen Áýezov aýdanynyń turǵyny.
Erbolat Dosaev teń qoljetimdilik pen teń múmkindik máselesi erekshe baqylaýda ekenin atap ótti.
«Men arnaıy komıssııa qurdym, ony ózim basqaramyn. Qala qurylysy keńesine qatysty máseleni ınklıýzıvti qoǵamǵa engizdim. Qurylys erejesinde biz qazir osyndaı ókilettikke ıe boldyq. Memleket basshysy Almatynyń erekshe mártebesi týraly Zańǵa ózgerister men tolyqtyrýlarǵa qol qoıdy, onda nysandardy qabyldaý, talaptar boıynsha máseleler kózdeledi. Almaty qalasynyń dızaın-kodynda biz qajetti zattardy bekittik», - dedi Erbolat Dosaev.
Aıtýynsha tek Áýezov aýdanynda jyl sońyna deıin 5 jerústi ótkeli jańa standart boıynsha qaıta jańartylady.
Megapolıs basshysy lıft kiltiniń ornyna azamattardyń, onyń ishinde qarttar men erekshe qajettiligi bar adamdardyń jeńildetilgen sanatyn eskeretin «Onaı» kartochkalaryn paıdalaný múmkindigi qarastyrylyp jatqanyn jetkizdi.
«Ókinishke qaraı keıbir qala turǵyndarynyń mádenıeti tómen, bul ótkelde lıftti paıdalanýǵa qatysty. Sondyqtan biz oǵan shynymen muqtaj jandardyń múddesi úshin shekteýler engizýge májbúrmiz.Aýdandaǵy lıftter osy jyldyń sońyna deıin jóndeledi», - dedi Almaty ákimi.
