Jertóleler men parkıngter panalaý oryndaryna beıimdeledi
ASTANA. KAZINFORM — Qazaqstanda halyqty panalaý oryndarymen qamtamasyz etý qaǵıdalary bekitildi. Jańa standart jertólelerdi, jerasty parkıngterin jáne basqa da jer asty keńistikterin qamtıdy
2026 jyldyń 1 qańtarynan bastap Qazaqstanda tótenshe jaǵdaılar kezinde paıdalanylatyn panalaý oryndaryna arnalǵan jańa standart kúshine endi.
Atap aıtqanda, ST RK 4016-2025 qujaty jertólelerdi, parkıngterdi jáne basqa da jer asty úı-jaılaryn halyqty qorǵaý maqsatynda beıimdeýge qoıylatyn talaptardy aıqyndaıdy. Atalǵan standart 2025 jylǵa arnalǵan Ulttyq standarttaý jospary sheńberinde Tótenshe jaǵdaılar mınıstrliginiń ótinimi negizinde QazStandart tarapynan ázirlendi.
Saýda jáne ıntegratsııa mınıstrliginiń Tehnıkalyq retteý jáne metrologııa komıtetinde qujattyń tótenshe jaǵdaılarǵa daıyndyq deńgeıin arttyrýǵa jáne halyq qaýipsizdigin qamtamasyz etýge baǵyttalǵany atap ótti.
Álemdik tájirıbede halyqty qorǵaý úshin jertóleler, tsokoldik qabattar, jerasty ótkelderi men metropolıten sııaqty jer asty keńistikteri keńinen qoldanylady. Qazaqstanda da mundaı nysandar azamattyq qorǵanysqa arnalǵan qorǵanys qurylystary retinde beıimdelýi múmkin.
— Jańa standart qoldanystaǵy normatıvtik olqylyqtardy joıyp, panalaý oryndaryna qoıylatyn biryńǵaı talaptardy engizedi. Qujat tabıǵı, tehnogendik jáne áskerı sıpattaǵy tótenshe jaǵdaılar kezinde halyqty qorǵaý maqsatynda ǵımarattardy tekserý jáne olardy beıimdeý tártibin aıqyndaıdy.
Standartta úı-jaılardyń qurylymy men josparlanýyna, sondaı-aq tirshilikti qamtamasyz etý júıelerine qoıylatyn talaptar belgilengen. Olardyń qataryna jeldetý, sýmen jabdyqtaý, elektrmen qamtý, sanıtarııalyq jaǵdaılar jáne baılanys júıeleri kiredi. Sonymen qatar ǵımarattardyń tehnıkalyq jaı-kúıin baǵalaý tártibi, onyń ishinde kótergish konstrýktsııalar men ınjenerlik júıelerdi tekserý talaptary qamtylǵan, — delingen habarlamada.
Qajet bolǵan jaǵdaıda konstrýktsııalardy kúsheıtý jáne úı-jaılardy qaıta beıimdeý sharalary kózdelgen. Standartta tıptik ınjenerlik sheshimderdiń úlgileri men panalaý oryndarynyń jaramdylyǵyn baǵalaý kestesi berilgen.
Joba Tótenshe jaǵdaılar mınıstrligi, Qorǵanys mınıstrligi, Ekologııa jáne tabıǵı resýrstar mınıstrligi, sondaı-aq basqa da múddeli memlekettik organdar men uıymdarmen kelisilgen.
Kelisý barysynda usynylǵan eskertýler tehnıkalyq sheshimderdi ázirleý kezinde geografııalyq, klımattyq jáne seısmıkalyq erekshelikterdi eskerý, ushqyshsyz ushý apparattarynan qorǵaný tetikterin engizý, qaıta beıimdeý syzbalarynyń úlgilerin qosý, panalaý oryndarynyń konstrýktsııalaryn kúsheıtý jáne halyqtyń qoljetimdiligin qamtamasyz etetin avtomattandyrylǵan júıelerdi engizý máselelerin qamtydy. Barlyq usynys eskerildi.
Atalǵan standartty qabyldaý jer asty keńistikterin tıimdi paıdalanýdyń biryńǵaı tásilin qalyptastyrýǵa jáne tótenshe jaǵdaılar kezinde halyqty qorǵaý deńgeıin arttyrýǵa múmkindik beredi.
Aıta ketelik parkıngti «bombadan qorǵaıtyn oryn» retinde paıdalaný normamen bekitilgen edi.