Jerorta teńizindegi keme apatynan keıin qyz bala iz-túzsiz joǵaldy

ASTANA. KAZINFORM — Italııanyń Lampedýza araly mańynda mıgranttar mingen keme aýdarylyp, sýǵa batyp ketti. Jaǵalaý kúzeti 50-ge jýyq adamdy qutqarǵanymen, bir qyz bala iz-túzsiz joǵalǵan, dep habarlaıdy Agenzia Nova.

Jerorta teńizindegi keme apatynan keıin qyz bala iz-túzsiz joǵaldy
Foto: agenzianova.com

Qutqarylǵan adamdar aralǵa tún ortasyna deıin jetkizilgen. Joǵalǵan balanyń anasy medıtsınalyq pýnktte dárigerlerdiń baqylaýynda. Qyzyl Krest mamandary oǵan psıhologııalyq kómek kórsetip jatyr.

Osy ýaqytta Sıtsılııa aralynyń jaǵalaýynda taǵy bir qutqarý operatsııasy júrgizildi. Potstsallo portyna shamamen 250 shaqyrym jerde ashyq teńizde 55 mıgrant mingen shaǵyn balyq aýlaý kemesi tabylǵan. Keme teńizde baǵytynan adasyp, qalqyp júrgen.

Qaıyqty tabýǵa Mayday dabyly, Eýropalyq shekara jáne jaǵalaý kúzeti agenttiginiń (Frontex) ushaǵy men Italııa Qarjy gvardııasynyń tikushaǵy kómektesken.

Qutqarý jumystary aýa raıynyń qolaısyzdyǵyna qaramastan túni boıy jalǵasty. Mamandar kóriný qashyqtyǵy nashar ári teńiz tolqyny qatty jaǵdaıda jumys isteýge májbúr boldy. Operatsııaǵa saýda kemeleri de qosylyp, Italııa Áskerı-teńiz kúshteriniń kemesi qoldaý kórsetti.

Nátıjesinde 55 adamnyń barlyǵy qutqaryldy. Aldyn ala málimet boıynsha olardyń jaǵdaıy qanaǵattanarlyq. Mıgranttardy Potstsallo portyna birneshe saǵat ishinde jetkizý josparlanǵan.

Al Lampedýza araly mańyndaǵy keme apatynan keıin joǵalǵan qyz balanyń taǵdyry ázirge belgisiz.

Aıta keteıik, Úndistan áskeri Somalı jaǵalaýynda qaraqshylar basyp alǵan kemeden 20 teńizshini qutqardy.