Jerorta teńizin kesip ótpek bolǵan 11 zańsyz mıgrant qaza tapty
ASTANA. KAZINFORM – Malta jaǵalaýynda zańsyz mıgranttardy tasymaldaǵan qaıyq aýdarylyp, 11 adam qaza tapty. Sýǵa ketken adamdardy túrik balyqshylary qutqaryp qaldy, dep habarlaıdy Anadolu Ajansı.
Qaıǵyly oqıǵa Lıvııa, Týnıs, Malta jáne Italııa arasyndaǵy zańsyz kóshi-qon baǵyttarynyń birinde, Jerorta teńiziniń ortalyq bóliginde bolǵan.
Italııanyń jaǵalaý kúzeti qyzmetine silteme jasaǵan jergilikti BAQ málimetinshe, bortynda 60-tan astam zańsyz mıgrant bolǵan qaıyq Maltanyń ońtústik-shyǵysynan shamamen 45-50 teńiz mıli qashyqtyqta aýdarylǵan.
Teńizge qulaǵan adamdarǵa jaqyn mańda júrgen balyq aýlaý kemesi kómekke kelgen.
Maltanyń ishki ister jáne qaýipsizdik mınıstri Glenn Bedıngfıld X áleýmettik jelisinde Maltadan shyǵysqa qaraı shamamen 50 teńiz mıli jerde 53 zańsyz mıgranttyń qutqarylǵanyn, sondaı-aq 11 adamnyń máıiti tabylǵanyn habarlady.
– Mundaı qaıǵyly oqıǵalardyń qaıtalanbaýy úshin adam saýdasymen aınalysatyn qylmystyq toptarǵa qarsy Eýropa deńgeıinde batyl sharalar qabyldanyp, Jerorta teńizi óńirindegi kóshi-qon máselelerine qatysty úılestirilgen saıasat qajet, – dedi Glenn Bedıngfıld.
Oqıǵa kezinde erekshe ról atqarǵan túrik balyqshylary keminde 48 adamnyń ómirin saqtap qalǵan. Olar der kezinde kómek kórsetip, qurbandar sanynyń artýyna jol bermegen.
Aıta keteıik, Fılıppındegi jer silkinisinen qaza tapqandar sany 32 adamǵa jetti.
