Jerorta teńizi elderin aptap ystyq pen orman órti sharpydy

ASTANA. KAZINFORM — Jerorta teńizi aımaǵyndaǵy elderde aptap ystyq pen orman órtteri beleń aldy, dep habarlaıdy Kazinform agenttiginiń menshikti tilshisi. 

Meteorologııalyq málimetterge sáıkes, Jerorta teńizi aımaǵyndaǵy birqatar óńirlerde aýa temperatýrasy +40 °C-tan asyp, halyqtyń densaýlyǵyna, ekojúıege jáne ınfraqurylymǵa aıtarlyqtaı qaýip tóndirip otyr.

Qıyn jaǵdaı Túrkııa, Grekııa, Italııa, Ispanııa jáne Frantsııanyń ońtústiginde baıqalyp otyr. Kóptegen aýdanda órt qaýpiniń eń joǵarǵy deńgeıi jarııalanǵan. Tótenshe jaǵdaılar qyzmetteri táýlik boıy jumys istep jatyr, órt oshaqtaryn sóndirýge qurlyqtaǵy jáne áýedegi kúshtermen qatar eriktiler de tartylǵan.

Kóptegen eldiń bıligi azamattardy qorǵaý sharalaryn kúsheıtti: ormandy aımaqtardaǵy týrıstik baǵyttar jabylyp, órt qaýpi joǵary aımaqtarda kólik qozǵalysy shekteldi, ýaqytsha kómek jáne salqyndatý beketteri uıymdastyryldy.

Turǵyndar men týrısterge kún astynda uzaq bolmaýǵa jáne resmı eskertýlerge qulaq asýǵa shaqyrdy.

Klımatologtardyń aıtýynsha, mundaı ekstremaldy aýa raıy qubylystary jahandyq klımattyń ózgerýine baılanysty jıilep keledi. Aımaq elderiniń bıligi uzaq merzimdi beıimdelý sharalaryn qabyldaýǵa jáne tabıǵı qaýipsizdik salasyndaǵy yntymaqtastyqty kúsheıtýge shaqyryp otyr.

Qıyndyqtarǵa qaramastan, jedel áreket etý, halyqaralyq úılestirý jáne eriktilerdiń kómegi órttiń taralýyn shekteýge jáne keltiriletin shyǵyndy azaıtýǵa múmkindik berýde.

Mamandardyń aıtýynsha, maýsym aıynda temperatýra kúrt kóterilip, Jerorta teńizi elderinde aýa +40 °C-tan joǵary deńgeıge jetken. Bul jaǵdaı orman jáne aýylsharýashylyq jerlerindegi órt qaýpin kúsheıtti. Qurǵaq shóp pen jeldiń áseri jalynnyń tez taralýyna sep boldy.

Túrkııanyń Orman sharýashylyǵy bas basqarmasynyń dereginshe, 1–30 maýsym aralyǵynda elde barlyǵy 1 563 órt tirkelgen. Onyń ishinde 612-si ormanda, 951-i aýylsharýashylyq alqaptarynda bolǵan. 499 orman órti bastapqyda egistik jerlerde bastalyp, keıin ormanǵa taralǵan.

1–16 maýsym aralyǵynda, aýa raıy maýsymdyq norma sheginde bolǵan kezde, elde 203 orman órti tirkelgen. Al aıdyń ekinshi jartysynda aptap kúsheıip, 409 orman órti bolǵan. Tek 27–30 maýsym aralyǵynda 147 orman jáne 195 aýylsharýashylyq órti bolǵan.

Buǵan deıin Túrkııanyń birneshe óńirinde orman órti sóndirilgeni habarlanǵan. Alaıda aýa temperatýrasynyń joǵary bolýyna baılanysty órt qaýpi áli de saqtalyp otyr.