Jerorta teńizine qulaǵan efıopııalyq «Boıng-737" ushaǵynan aman qalǵan eshkim tabylmady
ASTANA. Qańtardyń 26-sy. QazAqparat - Lıvan Premer-mınıstri Saad Harırı Jerorta teńizine qulaǵan efıopııalyq áýe laıneriniń bortyndaǵy eldiń 54 azamatynyń qazasyna baılanysty ulttyq aza tutý kúnin jarııalady.
Ushaq apatynda barlyǵy 90 adam qaza tapty, onyń jeteýi - ekıpaj músheleri. Oqıǵa ornynda 23 jolaýshynyń denesi jáne ushaqtyń synyqtary tabylyp otyr, aman qalǵan eshkim joq. Degenmen, Lıvan jaǵalaýynda izdeý-qutqarý operatsııasy jalǵasýda. Bul sharaǵa BUU-nyń Lıvandaǵy Ýaqytsha kúshteriniń tikushaqtary men kemeleri de atsalysýda.
Baspasóz máslıhatynda sóz sóılegen el Prezıdenti Mıshel Sýleıman, "Boıng-737" bortynda lańkestiktiń bolý múmkindigi týraly dolbardy teriske shyǵardy. «Bul qaıǵyly oqıǵa jáne biz, aýa raıynyń qolaısyzdyǵyna qaramastan, adamdardy izdestirýge bar kúsh-jigerimizdi salyp otyrmyz», dedi ol.
Eldiń kólik mınıstri Ǵazı ál-Arıdı, «Boıng» apatynyń sebebi «qara jáshik» tabylǵannan keıin anyqtalatynyn» atap kórsetti. Degenmen, aldyn-ala málimetter boıynsha, ushaqtyń qulaýyna naızaǵaıdyń sebep bolý yqtımaldyǵy aıtylýda.
Efıopııa elordasy - Addıs-Abebaǵa bara jatqan "Boıng" áýejaıdan kóterilgennen 5 mınýttan keıin radardan joǵalyp ketken bolatyn.
