Jerorta teńizinde joǵalyp ketken mysyrlyq ushaqtyń synyqtary tabyldy
ASTANA. QazAqparat - Joǵalyp ketken EgyptAir avıakompanııasynyń A320 ushaǵynyń synyqtary bolýy tıis ushaq synyqtary Jerorta teńizinen tabyldy, dep habarlaıdy Bı-Bı-Sı agenttigi.
Ushaqtyń bólikteri Aleksandrııadan 290 km jerden tabyldy. Bul aqparatty EgyptAir áýekompanııasy da rastady.
Jergilikti áskerıler ushaq synyqtarymen birge MS804 reıs jolaýshylarynyń jeke zatttary tabylǵandyǵyn málimdedi.
Eske sala ketsek, keshe Mysyrdyń Azamattyq avıatsııa mınıstrligi EgyptAir avıakompanııasynyń A320 laıneriniń apatqa ushyraǵanyn rastady. Ushaq kúndiz Parıjden Kaırge bet alǵan, Mysyr jaǵalaýynan shamamen 280 shaqyrym jerde radardan joǵalyp ketti.
Ushaqta 12 memlekettiń azamattary bolǵan. Jolaýshylardyń jalpy sany - 56. Ekıpaj músheleri segiz nemese toǵyz bolýy múmkin dep habarlanýda.
Qaıǵyly oqıǵa boıynsha Memleket basshysy Nursultan Nazarbaev Frantsýz Respýblıkasynyń Prezıdenti Fransýa Ollandqa jáne Mysyr Arab Respýblıkasynyń Prezıdenti Ábdel Fattah Ás-Sısıge kóńil aıtý jedelhattaryn joldady.
