Jerorta teńizinde taǵy 40-tan astam mıgrant qaza tapty
ASTANA. QazAqparat - Jerorta teńizinde mıgranttar mingen keme sýǵa ketip, keminde 40 kelimsek ajal qushqan. Bortta 400-ge jýyq bosqyn bolǵan desedi. Aman qalǵan 320 adam jaǵaǵa jetkizilgen.
Bul týraly 24.kz jazady.
Kemeniń ózi Lıvııa jaǵalaýynan 21 shaqyrym jerden tabylypty. Aıta keteıik, azamattyq soǵystan kóz ashpaı kele jatqan Lıvııa sııaqty elderdiń halqy Eýropaǵa aǵylyp jatyr. Jyl basynan beri Afrıka aımaǵynan kári qurlyqqa 50 myńnan astam zańsyz mıgrant Jerorta teńizi arqyly jetken. Alaıda asqaq armanyna jete almaı, orta jolda ólip ketip jatqandar da jetip artylady. Qańtar aıynan beri sol teńizde kemeleri apatqa ushyrap, ajal qushqandardyń sany 2 myńnan asty.
