Jerorta teńizinde qaıyq aýdarylyp, 130-ǵa jýyq mıgrant opat boldy
NUR-SULTAN. QazAqparat – Zańsyz mıgranttardy alyp kele jatqan qaıyq Lıvııa jaǵalaýynda aýdarylyp, 130-ǵa jýyq adam qaza tapty, dep habarlaıdy QazAqparat SOS Mediterranee úkimettik emes uıymyna silteme jasap.
Oǵan tıesili Ocean Viking kemesi osy aımaqta apatqa ushyraǵan úsh qaıyq týraly aqparat alǵannan keıin Lıvııa jaǵalaýyna halyqaralyq sýlarǵa jiberilgeni aıtylady.
«Biz búgin oqıǵa ornyna kelgennen beri birde-bir tiri adamdy tappadyq, degenmen apat bolǵan jerde ondaǵan adamnyń máıitin kórdik» – delingen uıymnyń habarlamasynda.
Qutqarý operatsııasy aýa raıynyń qolaısyzdyǵy saldarynan qıyndap ketti. Іzdeý aımaǵyndaǵy tolqyndar 6 m-ge jetti. Kóp uzamaı EO shekara baqylaý agenttiginiń «Fronteks» ushaǵy oqıǵa ornyna jaqyn jerde rezeńke qaıyqtyń fragmentterin tapty.
