Jerleýge arnalǵan bir jolǵy tólem qalaı taǵaıyndalady
«Qoldanystaǵy zańnamaǵa sáıkes jerleýge arnalǵan járdemaqy zeınetkerler, memlekettik áleýmettik járdemaqylar men memlekettik arnaıy járdemaqy alýshylar qaıtys bolǵan jaǵdaıda taǵaıyndalady. Jerleýge arnalǵan birjolǵy tólem mólsheri 2023 jylǵy 1 shildeden bastap 35 AEK (aılyq eseptik kórsetkish) nemese 120 750 teńge. Tólemdi «Azamattarǵa arnalǵan úkimet» memlekettik korporatsııasynyń bólimshesine júginý arqyly, www.egov.kz «elektrondyq úkimet» veb-portaly, sondaı-aq proaktıvti qyzmetpen alýǵa bolady», - delingen Eńbek jáne halyqty áleýmettik qorǵaý mınıstrliginiń QazAqparat tilshisi joldaǵan saýalǵa jaýabynda.
Odan bólek, biryńǵaı jınaqtaýshy zeınetaqy qorynda (BJZQ) jınaǵy bar adam qaıtys bolǵan jaǵdaıda onyń otbasy múshelerine 94 AEK (2023 jylǵy 1 shildeden bastap – 324 300 teńge) kóleminde jerleýge birjolǵy tólem taǵaıyndalady.
Biraq tólem qaıtys bolǵan adamnyń jeke zeınetaqy shotynda bar qarajattan artyq bolmaýy tıis. Tólemdi alý úshin turǵylyqty jeri boıynsha BJZQ fılıalyna júginý kerek.
«Sondaı-aq zeınetaqy annýıteti shartyn jasasqan adam qaıtys bolǵan jaǵdaıda saqtandyrý uıymy zeınetaqy annýıteti shartynda belgilengen mólsherde, keminde 35 AEK (2023 jylǵy 1 shildeden bastap – 120 750 teńge) tólem jasaıdy», - deıdi vedomstvodan.
