Jerleýge apara jatyp baladan tezirek qutylýdy oılaǵan - 5 jasar balanyń denesi qoqysqa qaıdan kelgen

TALDYQORǴAN.QazAqparat - Almaty oblysynda bes jasar balanyń óli denesi qoqysta qalaı paıda bolǵany anyqtaldy. Qazir qaıtys bolǵan balanyń 20 jastaǵy anasy men anasynyń týǵan 2001 jylǵy aǵasy polıtsııaǵa jaýap berip jatyr, dep habarlaıdy QazAqparat tilshisi.

Qaıtys bolǵan balanyń naǵashy aǵasy kishkentaıdy molaǵa jerlemek bolǵan. Olardyń anasy da qaıtys bolǵan eken. Sózinshe, sol anasy jerlengen zıratqa bara jatyp, jardy kórip balanyń múrdesin sol jerge tastap ketken.

«Aǵasy máıitti qoqys alańyna tastap ketken sebebin túsindirdi. Aıtýynsha, deneni molaǵa apara jatqan. Tún ýaqyty bolǵan. Tún bolǵan soń ári qaraı júrýge qoryqtym deıdi. Іshinde bireý kórip qoıa ma degen úreı bolǵanyn aıtady. Sol sebepti baladan tezirek qutylýdy oılaǵan. «Úlken jardy kórdim, sol jerge tastap kettim» deıdi. Sózine sensek, bala aıy-kúni jetpeı, tolyq jetilmeı týǵan. Sol oqıǵanyń aldynda kishkentaı úsh kún boıy aýyrǵan. Biraq anasy da, aǵasy da eshqaıda habarlamaǵan. Úsh kún aýyrsa da, balanyń aýyrǵanyn eshkimge aıtpaı, balanyń qaıtys bolǵanyn kútip jatqandaı bolǵan», - dedi Sarqan aýdany prokýrorynyń orynbasary Edil Qorǵanbaev.

Anasynyń sózinshe, ol qyzyn óltirmegen. Bala aýyryp qaıtys bolǵan.

Biraq polıtsııaǵa balasynyń múrdesi qoqysqa tastalǵanyn bilmedim dep jaýap beripti.

Ózi turmys qurmaǵan. Jaqynda ekinshi balasyn bosanypty. Bes aılyq balasy bar 20 jasar jas ananyń óz ata-anasy da marqum bolǵan.

Esterińizge sala keteıik, buǵan deıin Almaty oblysy Sarqan aýdanynda bes jasar balanyń máıiti qoqystan tabylǵanyn habarlaǵan bolatynbyz.

Quzyrly organnyń aqparatyna sáıkes, búgin balanyń anasy anyqtaldy. Ol - 2002 jyly týǵan Sarqan qalasynyń turǵyny.

Balasyn 2017 jyly ıaǵnı, 15 jasynda dúnıege ákelgen. Tergeý júrip jatyr.