Jerlesimiz S. Podobedova úsh rekord ornatyp, Álem chempıony atandy
ASTANA. Qyrkúıektiń 24-i. QazAqparat - Túrkııanyń Antalıada qalasynda ótip jatqan Aýyr atletıkadan álem chempıonatynda qazaqstandyq sportshy Svetlana Podobedova úsh altyn jeńip aldy.
Keshe birinshiliktiń qyzdar arasyndaǵy 75 kelige deıingi salmaq dárejesinde kezekti synynda óner kórsetken S.Podobedova 3 álemdik rekord ornatty. Ol óziniń osydan bir jyl buryn Álem chempıonatynda ornatqan rekordtaryn qaıta jańartty. Julqa kóterýde 134 kelini baǵyndyrǵan ol, serpe kóterýde 161 kelini kóterdi. Eki saıystyń nátıjesi boıynsha - 295 keli.
Onda bizdiń jerlesimiz S. Podobedovaǵa reseılik shtangashy qyzdar Nadejda Evstıýhına men Natalıa Zabolotnaıa edáýir qarsylyq kórsetti. Zabolotnaıa tipti julqa kóterýde Podobedovanyń byltyrǵy 132 kelilik rekordyn asyryp, 133 keli salmaqty kótergen bolatyn. Biraq reseıliktiń bul rekordy tek birneshe mınýttarǵa ǵana sozyldy. Qazaqstan sportshysy S.Podobedova 134 kelini julqa kóterip, álem rekordyn qaıta jańartty.
Ekinshi saıysta N. Evstıýhına men N. Zabolotnaıa taǵy da joǵary kórsetkishterge qol jetkizdi. Serpe kóterýde olardyń ekeýi de Podobedovanyń byltyrǵy rekordyn qaıtalap, 160 kelini baǵyndyrdy. Otandasymyz bul jaıtty qaıtadan qalpyna keltirdi. Ol serpe kóterý saıysynda 161 keligie tapsyrys berip, úlken júldeni báıgege tikti jáne qatelesken joq. Qazaqstandyq qyz 161 kelilik zil temirdi basynan asyra kóterdi.
Qazir Qazaqstan quramasynyń qorjynynda 5 altyn bar.
