Jerlesimiz E. Levkın bıiktigi 95 metrlik tuǵyrdan sekirýden Azıada chempıony atandy, qorjynymyzda 19 altyn bar
ALMATY. 4 aqpan. QazAqparat /Nazıra Eleýhan/ - Qazaqstandyq sportshy Evgenıı Levkın shańǵymen tuǵyrdan sekirýden 7-Qysqy Azııa oıyndarynyń chempıony atandy. Osylaısha Qazaqstan quramasynyń qorjyny 19-altyn medalmen tolyqty.
Búgin Almatydaǵy Shańǵymen tuǵyrdan sekiretin halyqaralyq keshende ótken bıiktigi 95 metrlik tuǵyrdan sekirýden jekeleı syn jarysynda Evgenıı Levkın eki sekirýdiń qorytyndysy boıynsha 252 ball jınap, tuńǵysh ret Aq Azıada chempıony atandy. Kúmis júldeni bıiktigi 125 metrlik tuǵyrdan sekirýden chempıon atanǵan japonııalyq Kazýıa Iosıoka (Kazuya Yoshioka) ıelendi. Ol eki sekirýdiń nátıjesi boıynsha 248,5 ball jınady. Qola júldeni 245 ballmen taǵy bir qazaqstandyq qanatty shańǵyshy Radık Japarov jeńip aldy.
Jarysqa Qazaqstannan - 6 , Japonııadan - 2, Qytaıdan -1, al Koreıadan - 2, barlyǵy 11 sportshy qatysty.
Bul jarysta ózge qazaqstandyq sportshylar Nıkolaı Karpenko tórtinshi, Alekseı Korolev segizinshi, Konstantın Sokolenko toǵyzynshy, Asan Toqtaqynov onynshy oryn aldy.
Sportshylardyń óneri - sekirý qashyqtyǵyna jáne onyń ádemi oryndalýyna baılanysty baǵalandy. Oǵan 5 tóreshi 20 ballǵa deıingi oryndaý stıli jáne arnaıy keste boıynsha sekirýdiń qashyqtyǵyna baǵa beredi.
Aıta keteıik, 31 qańtar bıiktigi 125 metrlik tuǵyrdan sekirýden jekeleı syndy altyn jáne kúmis júldelerdi
japonııalyq qanatty shańǵyshylar Kazýıa Ioshıoka (Kazuya Yoshioka) men Kazıoshı Fýnvakı (Kazuyoshi Funaki) ózara bólisken edi. Onda qazaqstandyq Nıkolaı Karpenko qola júldeger atanǵan bolatyn. Ol jarysta búgingi chempıony Evgenıı Levkın altynshy oryn alsa, al qola júldeger Radık Japarov segizinshi orynnan kóringen edi.
