Jerin daýlaǵan aqtóbelik qarııa oblys ákimdiginiń aldyna jylap bardy
Aqtóbeniń Áıteke bı aýdanynda turatyn Nátıpa Segizbaeva Aqtóbe oblysynyń ákimi Berdibek Saparbaevpen kezdesýdi kútip júr. Búgin qarııa oblys ákimdiginiń ǵımaratyna kelip, baspaldaqta óńir basshysyn kútip otyrdy.
«Jer daýymen keldim. Qolymda jer ýchaskesine menshik quqyǵyn, turaqty jer paıdalaný quqyǵyn beretin akt bar. Akt boıynsha 498,8 gektar jer «Aınalaıyn» sharýa qojalyǵyna tıesili. Bul jer aktisi 1997 jyly berildi. Sońǵy 3 jylda jerimdi basqa sharýa ıemdenip otyr. Men arasha surap, ádildik izdeımin»,- dedi Nátıpa Segizbaeva.
Qarııa bul máselelerdi aıtyp, Áıteke bı aýdanynyń ákimdigine barǵan. Endi quqyq qorǵaý organdaryna aryz jazbaq. Bul problemany aýdan ákimdigi biledi.
«Nátıpa Segizbaevanyń sharýa qojalyǵy bar. Segizbaevtarǵa tıesili «Aınalaıyn» sharýa qojalyǵynyń janynda «Aqjol» sharýa qojalyǵy ornalasqan. Olar memlekettik baǵdarlamalarǵa qatysyp, jumys istep jatyr. Al qarııa «meniń jerimdi paıdalanyp jatyr, maǵan ótemaqy tóleý kerek» dep ákimdikke shaǵymyn aıtyp keldi. Biraq kórshi sharýashylyq ol adamnyń jerin paıdalanyp otyrǵan joq. Aýdandyq ákimdik komıssııa quryp, túsindirý jumystaryn júrgizdi. Áıteke bı aýdandyq jer qatynastar bólimi oblystyq jer ınspektsııasyn shaqyryp, komıssııa tekserý júrgizdi, qorytyndysyn aıtty. Negizi «Aınalaıyn» sharýa qojalyǵynyń jeri bos jatyr»,- dedi Áıteke bı aýdany ákiminiń orynbasary Temirbek Rahmetov.
Aıta keteıik, oblys ákimdigi janynda otyrǵan qarııany polıtsııa qyzmetkerleri alyp ketti.
