Jergilikti joldardy salýǵa qansha qarajat bólindi

ASTANA. KAZINFORM – Normatıvtik jaǵdaıǵa keltirilgen jergilikti joldardy úlesi 91 paıyzǵa jetkiziledi. Bul týraly Senatta joldardyń máselesin talqylaýǵa arnalǵan Úkimet saǵatynda Kólik mınıstri Marat Qarabaev málim etti.

- Respýblıkalyq deńgeıdegi joldardy damytýmen qatar, jergilikti jeli jobalaryna da kóńil bólinedi. Olardyń uzyndyǵy 70 myń shaqyrym (oblystyq – 32 myń km, aýdandyq – 38 myń km). Bul jobalardy jalpy qarjylandyrý kólemi 423 mlrd teńge, onyń ishinde respýblıkalyq bıýdjet – 92 mlrd teńge, transfertter – 148 mlrd teńge, jergilikti bıýdjet – 183 mlrd teńge. Bólingen qarajat esebinen 4,2 myń shaqyrym jol qurylys-montaj jumystarymen qamtyldy, onyń 3,9 myń shaqyrymy osy jyly paıdalanýǵa beriledi, - dedi M. Qarabaev.

Onyń aıtýynsha, 2024 jyldyń qorytyndysy boıynsha normatıvtik kúıdegi jergilikti joldardyń úlesi 89 paıyzdy qurady. Al bıyldyń sońyna deıin osy kórsetkish 91 paıyzǵa deıin ósedi.

Budan buryn habarlanǵandaı, senator jergilikti joldardyń sapasyna qatysty problemany atady.