Jergilikti joldardy basqarýdyń biryńǵaı tásili qalyptasady - Kólik mınıstrligi

QR Kólik mınıstrligi baspasóz qyzmetiniń habarlaýynsha, «Sapaly joldar: josparlaýdan paıdalanýǵa deıin» taqyrybyndaǵy semınar ortalyq jáne jergilikti atqarýshy organdardyń birlesken jumysyn jolǵa qoıýǵa arnalǵan praktıkalyq alańǵa aınalmaq.

-Úsh kún ishinde qatysýshylar joldardy josparlaý, jobalaý, qurylys-montaj jumystary, sapany baqylaý, paıdalaný jáne jol jelisin tsıfrlandyrý máselelerin qarastyrady. Negizgi nazar jergilikti joldardaǵy naqty problemalar men olardy sheshý joldaryna aýdarylady, – dedi Kólik vıtse-mınıstri Maqsat Qalıakparov.

Іs-sharaǵa Kólik mınıstrliginiń ókilderi, oblystar men respýblıkalyq mańyzy bar qalalar ákimderiniń orynbasarlary, ákimdikterdiń beıindi basqarmalarynyń basshylary, múddeli memlekettik organdardyń, jobalaý jáne merdiger uıymdardyń ókilderi qatysyp jatyr.

Semınardyń negizgi baǵyttarynyń biri – óńirlerdegi jol jumystarynyń negizdelgen josparlaryn qalyptastyrý. Bul rette joldardyń naqty jaı-kúıi eskerilip, dıagnostıka nátıjeleri negizinde basym ýchaskeler aıqyndalady. Sondaı-aq jóndeý túrlerin naqty ajyratyp, qabyldanatyn sheshimderdi joldyń naqty jaǵdaıymen baılanystyrý kózdelip otyr.

Jobalaý máselelerine de jeke kóńil bólinedi. Qatysýshylar jobalardy aldyn ala saraptaý, jol tóseminiń úlgilik konstrýktsııalaryn qoldaný, BIM-jobalaýdy engizý, sondaı-aq joldyń negizi, kólik júktemesi, klımattyq jaǵdaılar men jergilikti materıaldardyń qoljetimdiligin eskere otyryp, tıimdi konstrýktıvtik sheshimderdi tańdaý máselelerin qarastyrady.

Jol qurylysyna paıdalanylatyn materıaldar men oryndalǵan jumystardyń sapasyn baqylaý da semınardyń mańyzdy baǵyttarynyń biri. Zerthanalyq baqylaý, synama alý jáne synaq nátıjeleriniń durystyǵy, bıtým, qıyrshyq tas pen asfaltbeton sapasy, sondaı-aq belgilengen talaptarǵa sáıkessizdik anyqtalǵan jaǵdaıda qabyldanatyn sharalar talqylanady.

Taǵy bir mańyzdy baǵyt – oblystyq jáne aýdandyq mańyzy bar, sondaı-aq eldi mekenderdiń kóshelerindegi salynǵan jáne jóndelgen joldardy tıisti deńgeıde kútip ustaý. Qatysýshylar joldardy kútip-ustaý, maýsymdyq jumystar, qajetti tehnıka men materıaldarmen qamtamasyz etý, sondaı-aq aýyr júk kólikterine qoıylatyn shekteýlerdiń saqtalýyn qosa alǵanda, jol jelisiniń saqtalýyn qamtamasyz etý máselelerin talqylaıdy.

Semınar barysynda jol salasyna arnalǵan tsıfrlyq sheshimder de tanystyrylady. Olar jol jelisiniń jaı-kúıi men jumystardyń oryndalý barysyn baqylaýǵa, anyqtalǵan kemshilikterdi tirkeýge jáne osy derekterdi basqarýshylyq sheshimder qabyldaý kezinde paıdalanýǵa múmkindik beredi.

Kólik mınıstrligi joldardy dıagnostıkalaý jáne basym baǵyttardy aıqyndaýdan bastap jobalaý, qurylys, jóndeý jáne keıingi kútip ustaýǵa deıingi barlyq kezeńderdi qamtıtyn biryńǵaı basqarý tásilin qalyptastyrýdy kózdeıdi.

Semınar qorytyndysy boıynsha naqty sharalar, olardy iske asyrýǵa jaýapty tulǵalar men oryndaý merzimderi aıqyndalady. Sonymen qatar óńirlerdiń jergilikti avtomobıl joldarynyń sapasyn arttyrýǵa baǵyttalǵan aldaǵy úsh jylǵa arnalǵan jumys josparyn qalyptastyrý josparlanýda.

Іs-shara 2 qazanǵa deıin jalǵasady.

Osyǵan deıin halyqaralyq avtotasymaldarǵa ruqsat berý tártibi qaıta qaralatyny týraly jazdyq.