«Jergilikti polıtsııa qyzmeti» degen uǵym joıylady – Májilis

ASTANA. KAZINFORM — Búgin Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine ishki ister organdarynyń qyzmeti salasyndaǵy normalardyń artyq zańnamalyq reglamenttelýin bolǵyzbaý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.

Zań jobasy «Memlekettik apparat qyzmetin bıýrokratııadan aryltý jónindegi sharalar týraly» QR Prezıdentiniń 2022 jylǵy 13 sáýirdegi № 872 Jarlyǵyn iske asyrý maqsatynda ázirlendi. Oǵan sáıkes QR Úkimetine normalardyń zańnama jaǵynan shamadan tys reglamenttelýine jol bermeý turǵysynan zańnamalyq aktilerge revızııa júrgizý tapsyryldy.

- Zań jobasy aıasynda 16 zańǵa ózgeris engizý qarastyrylǵan. Atap aıtqanda, tıisti salany retteý jónindegi negizgi maqsattar men mindetterdi, quzyret qaǵıdattaryn jáne ókilettikterin belgileý qamtylǵan. Alqaly sheshim qabyldaýdy talap etetin jáne vedomstvaralyq sıpattaǵy máseleler boıynsha Úkimettiń quzyretin aıqyndaý eskerilgen. Іshki ister organdarynyń normatıvtik-quqyqtyq aktilerdi qabyldaý boıynsha jalpy quzyretin aıqyndaý qarastyrylǵan. Sonymen qatar, birqatar naqtylaıtyn fýnktsııalardy zańdardan alyp tastap, olardy zańǵa táýeldi aktilerdiń deńgeıinde bekitý usynylady, - dedi QR Іshki ister mınıstriniń orynbasary Sanjar Ádilov.

Májilistiń Zańnama jáne sot-quqyqtyq reforma komıtetiniń málimetine qaraǵanda, zań jobasynda 16 zańǵa olardy jetildirýge baǵyttalǵan ózgerister men tolyqtyrýlar engizý eskerilgen.

«Quqyqtyq aktiler týraly» Zańǵa sáıkes zańnamalyq aktilerden týyndaıtyn zańǵa táýeldi normatıvtik-quqyqtyq aktilerdi Úkimet memlekettik organdar týraly erejelerde aıqyndaıdy, bul zańdardy artyq normalardan «aryltýǵa» jáne zańǵa táýeldi aktiler deńgeıinde elde týyndaıtyn ózgeristerge olardy normatıvtik turǵydan retteý bóligindegi jedel den qoıýǵa múmkindik beredi.

Sonymen qatar, naqtylaý sıpatyndaǵy túzetýler kózdeledi. Atap aıtqanda, mynalar usynylady:

- ákimshilik qamaýǵa alynatyn adamdardy qabyldaý-bólý oryndarynda ustaý tártibin aıqyndaý;

– «jergilikti polıtsııa qyzmeti» (JPQ) degen uǵymdy alyp tastaý.

- Jalpy, tájirıbe kórsetkendeı, JPQ-ny ózgertý jáne qurý ózin-ózi aqtamady. «Іshki ister organdary týraly» Zańymen bekitilgen qoǵamdyq tártipti qamtamasyz etý, quqyq buzýshylyqtardyń aldyn alý jáne jol qaýipsizdigin qamtamasyz etý jónindegi tikeleı mindetterdi oryndaý ekinshi kezekke qoıyldy, óıtkeni jergilikti atqarýshy organdar JPQ úshin abattandyrý qaǵıdalaryn buzǵandardy anyqtaý, qurylys obektilerinen qaldyqtardy shyǵarý jáne taǵy basqalary sııaqty ózge de mindetterdi aıqyndaı bastady. Osylaısha, ishki ister organdarynyń negizgi mindetterin iske asyrýǵa baǵyttalǵan jalpy ákimshilik polıtsııanyń fýnktsııalary men ókilettikterin sáıkestendirý talap etiledi, - delingen Májilis komıtetiniń málimetinde.

Májilis depýtaty Jarqynbek Amantaıulynyń aıtýynsha, jergilikti polıtsııa qyzmetin qysqartý - zań jobasyndaǵy negizgi normanyń biri.

- Ýákiletti organnyń pikirinshe, ony qurý – kútiletin nátıjege saı kelmedi. Jergilikti polıtsııa qyzmeti jergilikti qaýymdastyqtyń polıtsııa jumysyna degen seniminiń artýyn qamtamasyz etý kerek edi. Alaıda, birqatar sebeppen 2018 jyldan bastap kezeń-kezeńimen birneshe qaıta qurý júrgizildi. Mysaly, ákimderge jergilikti polıtsııa qyzmetiniń basshylaryn taǵaıyndaý jónindegi fýnktsııany berý dara basshylyq qaǵıdatynyń buzylýyna jáne polıtsııa departamentteri men jergilikti polıtsııa qyzmetiniń basshylary arasyndaǵy kelispeýshilikke alyp keldi. Ýchaskelik ınspektordyń aldyna birinshi kezekte qoǵamdyq tártipti saqtaý boıynsha mindetter qoıyldy, nátıjesinde onyń halyqpen ózara is-qımyl jasaý jónindegi negizgi fýnktsııalary ekinshi orynda qaldy. Osyǵan oraı, quqyq buzýshylyqtyń aldyn alý jáne qoǵamdyq qaýipsizdikti qamtamasyz etý jónindegi eki basqarma qura otyryp, atalǵan qyzmetti qaıta uıymdastyrý usynylady, - dedi depýtat.

Eske salsaq, 2016 jyldyń 1 qańtarynan elimizde jergilikti polıtsııa qyzmeti óz jumysyn bastady.