Jergilikti óndiris aqsap tur: áskerı kıimge arnalǵan jabdyq áli de syrttan keledi
ASTANA. KAZINFORM — Qorǵanys mınıstrliginde 2026 jylǵa arnalǵan memlekettik qorǵanys tapsyrysy sheńberinde kıim-keshek múlkiniń sapasyn arttyrý máseleleri jáne úlgilerin qaraýdyń birinshi kezeńin qorytyndylaý keńesi ótti.
Keńes Qorǵanys mınıstriniń orynbasary general-leıtenant Qanysh Ábýbákirovtyń basshylyǵymen ótti. Oǵan qorǵanys vedomstvosynyń jáne otandyq jeńil ónerkásip kásiporyndarynyń ókilderi qatysty.
Kezdesý barysynda áskerı qyzmetshilerdi kıim-keshektiń túrleriniń jańa úlgilerimen qamtamasyz etýge erekshe kóńil bólindi. Qorǵanys mınıstrligi qoldanylatyn materıaldardyń sapasyna, tigin buıymdaryna jáne kıimdi paıdalaný sıpattamalaryna joǵary talaptar qoıatyny atap ótildi.
— Aldymen jetkiziletin kıim-keshektiń sapasy jaqsy bolýy kerek. Áskerı qyzmetshilerdiń jaýyngerlik daıyndyǵy men moraldyq jaǵdaıy formanyń qanshalyqty yńǵaıly, senimdi jáne fýnktsıonaldy bolýyna tikeleı baılanysty. Biz óndirýshilerden barlyq standarttyń saqtalýyn, sapaly materıaldardy paıdalanýdy jáne zamanaýı tehnologııalardy engizýdi kútemiz, — dep atap ótti general-leıtenant Qanysh Ábýbákirov.
Dıalog ashyq formatta ótti: taraptar tehnologııalyq protsesterdi jetildirý, zamanaýı sheshimderdi engizý jáne sapa standarttaryn arttyrý máseleleri tóńireginde pikir almasty. Jańa, sonyń ishinde óndiristi jańǵyrtatyn aldyńǵy qatarly tehnologııalardy engizetin zaýyttar jaqsy jaǵynan atap ótildi.
Jaqsy úlgilerin kórsetse de, birqatar kásiporyn áli kúnge deıin eskirgen jabdyqty paıdalanady, al konstrýktorlyq bıýrolardyń jumysy kúsheıtýdi qajet etedi.
Sonymen qatar, memleket tarapynan qoldaýǵa qaramastan, ımporttyq materıaldarǵa táýeldilik saqtalatyny atap ótildi. Qazirgi zamanǵy talaptarǵa sáıkes keletin matalar, bylǵary, fýrnıtýralar men materıaldyń astaryna paıdalanatyn otandyq óndiris damymaǵan.
Kezdesý barysynda Tyldyq qamtamasyz etý bas basqarmasy bastyǵynyń orynbasary polkovnık Áset Orazalın sóz sóıledi. Ol jetkiziletin ónimniń sapasyna taldaý jasap, sońǵy bir jarym jylda kıim-keshek pen aıaq kıimniń sapasyz úlgileri anyqtalǵanyn atap ótti. Ofıtserdiń aıtýynsha, tek 2024-2025 jyldar aralyǵynda 1200-den astam jazǵy jáne qysqy etik aýystyryldy, olar talaptarǵa saı kelmeıdi nemese zaýyttyq aqaýdan ekenin aıtty.
Sapany arttyrý úshin Qarýly Kúshterdiń Tyl mamandary dalalyq kıim-keshekterdi, ish kıimderdi, shulyqtardy, aıaq kıimderdi, jabdyqtardy jáne basqa da kerek-jaraqtardy qamtıtyn tehnıkalyq erekshelikterge ózgerister engizdi.
Keńes sońynda Qorǵanys mınıstriniń orynbasary ashyq formatta ótkiziletin kezdesýler oıtalqylarǵa, pikir almasýǵa tıimdi alań retinde qyzmet etetinin jáne oń pikirler aıtylatynyn atap ótti. Munyń bári áskerı qyzmetshilerge arnalǵan kıim-keshektermen qosa óndiriletin ónimniń sapasyn jaqsartý boıynsha júıeli jumysty jolǵa qoıýǵa arnalǵan.
Aıta ketelik Qorǵanys mınıstrliginiń quzyreti keńeıtilgen edi.