Jergilikti ǵalymdardyń ázirlemesi SQO-nyń jol qurylysynda synaqtan ótedi
PETROPAVL. KAZINFORM — Soltústik Qazaqstan oblysynyń ǵalymdary ónerkásiptik qaldyq — paıdalanylǵan germetıkti asfaltbeton qospasyna qosýdy usynyp otyr.
Kozybayev University baspasóz qyzmetiniń málimetinshe, ýnıversıtet ǵalymdary «QazAvtoJol» ulttyq kompanııasy oblystyq fılıalynyń mamandarymen kezdesip, ǵylymı ázirlemeni tanystyrdy. Talqylaýǵa Kozybayev University basshylyǵy men ǵalymdar, ákimdik ókilderi, jol kásiporyndarynyń mamandary qatysty.
«Hımııa jáne hımııalyq tehnologııalar» kafedrasynyń meńgerýshisi ıÝlııa Byzovanyń aıtýynsha, asfaltbeton qospasynyń quramyna paıdalanylǵan AG-4I germetıgin qosý qajet. Onyń quramdas bóligi jol jamylǵysynyń beriktigin, sýǵa tózimdiligin jáne uzaq merzimdiligin arttyrýǵa múmkindik beredi.
Kezdesý nátıjesinde taraptar tehnologııany tájirıbelik synaqtan ótkizýge ýaǵdalasty. «QazAvtoJol» ulttyq kompanııasy oblystyq fılıalynyń dırektory Talǵat Smaǵulovtyń aıtýynsha, modıfıkatsııalanǵan asfaltbeton qospasyn tóseý úshin avtomobıl jolynyń tájirıbelik ýchaskesin anyqtap, bólýge daıyn.
Qajetti zerthanalyq synaqtar Jol aktıvteriniń sapasy ulttyq ortalyǵy oblystyq fılıalynyń múmkindikteri sheginde tegin júrgiziledi. Kelesi kezeńde zerthanalyq zertteýler júrgizilip, asfaltbeton qospasy tájirıbelik ýchaskege tóseledi. Odan keıin jol jamylǵysynyń jaǵdaıyna monıtorıng júrgizilip, tehnologııanyń naqty paıdalaný jaǵdaılaryndaǵy tıimdiligi baǵalanbaq.
Buǵan deıin Mańǵystaýda sońǵy jol ýchaskeleriniń biri jóndelip jatqanyn jazǵan edik.
