Jergilikti bıýdjetterdiń respýblıkalyq bıýdjetke táýeldiligi 34%-ǵa deıin tómendeıdi - Bektenov
ASTANA. KAZINFORM – 2025 jyldyń qorytyndysy boıynsha ekonomıkanyń ornyqty ósimin saqtap qalýǵa qol jetkizildi. Bul týraly Úkimettiń keńeıtilgen otyrysynda Premer-mınıstr Oljas Bektenov málim etti.
- Úkimet ózińiz aıqyndap bergen el ekonomıkasyn odan ári nyǵaıtý jónindegi mindetterge jáne Qazaqstan halqyna Joldaýyńyzda aıtylǵan strategııalyq maqsattarǵa sáıkes 2025 jyly júıeli ózgeristerge negizdelgen is-sharalardy qabyldady. Salyq, tarıf jáne bıýdjet saıasatynda, tsıfrlyq jáne qurylys sektorlarynda, sondaı-aq áleýmettik salada qabyldanǵan sheshimder ekonomıkany damytýǵa tosqaýyl bolyp otyrǵan qurylymdyq dısproportsııalardy joıýǵa baǵyttaldy. Salyq jáne bıýdjet reformasy Ulttyq qordan nysanaly transfertterdi almaı-aq, elimizdiń úsh jyldyq bıýdjetin qalyptastyrýǵa múmkindik berdi. Ol 2028-shi jylǵa qaraı bıýdjet tapshylyǵyn jalpy ishki ónimniń 0,9%-na deıin qysqartýǵa yqpal etedi. Jergilikti bıýdjetterdiń respýblıkalyq bıýdjetke táýeldiligi 2025 jylǵy 50%-dan 2028 jyly 34%-ǵa deıin tómendeıdi. Іske asyrylǵan reformalar kezeńinde 2025 jyldyń qorytyndysy boıynsha ekonomıkanyń ornyqty ósimin saqtap qalýǵa qol jetkizildi, - dedi O. Bektenov.
Onyń aıtýynsha, qundyq mánde JІÓ-niń ósýi 20,1 mlrd dollardy qurady. Bul is júzinde iri ónerkásiptik óńirdiń JÓÓ-sine teń.
- Ekonomıkanyń ósýine qaramastan, jýyq arada sheshimin tabýǵa tıis birqatar ózekti máseleler bar.Úkimet elimizdiń ınfraqurylymyn jańǵyrtý jáne iri ónerkásiptik jobalardy júzege asyrýǵa basymdyq bere otyryp, tıisti bir dárejede shaǵyn jáne orta bıznesti qoldaýǵa kóńil bólý jaǵyn báseńdetip aldy. Al, bul sektorda shamamen 4,5 mıllıon adam, ıaǵnı ekonomıkalyq belsendi halyqtyń teń jartysy eńbek etedi. Sizdiń ekonomıkalyq turaqtylyqty qamtamasyz etý týraly tapsyrmańyzǵa sáıkes mıkro jáne shaǵyn bıznes sýbektilerine arnalǵan qarjylyq, qarjylyq emes jáne ınfraqurylymdyq qoldaý sharalaryn bir júıege keltiretin «Іsker aımaq» baǵdarlamasy bekitildi. Alaıda bul baǵdarlama ShOB-tyń barlyq áleýetin ashý úshin jetkiliksiz. Osyǵan baılanysty Úkimet bıznes-qoǵamdastyqpen birlesip qosymsha qarjylyq jáne retteýshilik sharalaryn ázirleýde. Osyndaı sharalardyń biri retinde shaǵyn jáne orta óndirýshilerdi zamanaýı jabdyqtarmen qamtamasyz etý baǵdarlamasyn atap ótýge bolady, - dedi Úkimet basshysy.
Aıta keteıik, Astanada Memleket basshysy Qasym-Jomart Toqaevtyń tóraǵalyǵymen Úkimettiń keńeıtilgen otyrysy ótip jatyr.