Jergilikti bıýdjet deńgeıinde memleket qarajatyn paıdalanýǵa qoıylatyn talaptar kúsheıtildi
ASTANA. KAZINFORM — Úkimet Joǵary aýdıtorlyq palatanyń usynymdaryn eskere otyryp, jergilikti bıýdjet deńgeıinde memleket qarajatyn paıdalaný tıimdiligin arttyrý boıynsha sharalar qabyldady.
Ótken jylǵy mamyrda Joǵary aýdıtorlyq palata Almaty oblysynda memlekettik resýrstardyń paıdalanylý tıimdiligine aýdıt júrgizdi. Aýdıt barysynda bıýdjetaralyq qatynastar men bıýdjettik júıe qaǵıdattarynyń saqtalmaý faktileri anyqtaldy.
— Qajetti fýnktsııalar men ókilettikteriniń bolmaýyna qaramastan, sondaı-aq naqty qajettiliksiz óńirdiń Ekonomıka jáne bıýdjettik josparlaý basqarmasy tómen turǵan bıýdjetterge aǵymdaǵy nysanaly transfertter aýdarǵan. Osynyń saldarynan 2023 jylǵy qarjylyq jyldyń sońyna qaraı oblystyń qalalary men aýdandarynyń qolma-qol aqshany baqylaý shottarynda qarajat paıdalanylmaı bos turyp qalǵan, — delingen aýdıtorlyq palata habarlamasynda.
Aýdıtorlardyń pikirinshe, mundaı bıýdjettik teńgerimsizdik bıýdjetti josparlaý men oryndaý barysynda jiberilgen zań buzý, sondaı-aq tıisti ádistemelik súıemeldeýdiń bolmaýy saldarynan týyndaǵan.
Osyǵan baılanysty Joǵary aýdıtorlyq palata Úkimetke bıýdjet deńgeıleriniń sapasy men teńgerimin arttyrý úshin qajet transfertterdi berý sharttaryn normatıvtik-quqyqtyq aktilerde (NQA) bekitýdi usyndy.
Nátıjesinde 2025 jylǵy 15 naýryzda Memleket basshysy qol qoıǵan jańa Bıýdjet kodeksinde bıýdjettik jáne memlekettik josparlaýǵa jaýapty ortalyq jáne jergilikti organdardyń barlyq deńgeıdegi bıýdjetaaralyq qatynastardy baqylaýy kózdelgen.
— Sonymen qatar jergilikti bıýdjetterdiń kiristeri men shyǵystaryna áser etetin normatıvtik-quqyqtyq aktilerdi qabyldaý jónindegi talaptar kúsheıtildi. Sondaı-aq jergilikti bıýdjetterdiń kiristerin azaıtatyn NQA jobalary bıýdjet deńgeıleri arasyndaǵy shyǵystardy bólý men nysanaly aǵymdaǵy transfertterdi berý qajettiligi eskerile otyryp qaralatyn bolady, — delingen habarlamada.
Sonymen birge Bıýdjet kodeksinde qarjy jyl ishinde boljamdy qolma-qol aqsha tapshylyǵyn jabý jáne bıýdjettiń qarjylyq teńgerimin qamtamasyz etý úshin bıýdjettik nesıelerdi paıdalaný múmkindigin kózdeıtin normalar naqtylandy. Óńirler men jergilikti bıýdjettik baǵdarlamalar ákimshilerine bıýdjet salasynda úlken derbestik berilip, bıýdjet zańnamasyn buzǵany úshin olardyń jaýapkershiligi kúsheıtildi.
— Memlekettik aýdıt nátıjesinde berilgen usynymdar men tapsyrmalar tolyq oryndalǵanǵa deıin Joǵary aýdıtorlyq palatanyń baqylaýynda bolady, — delingen habarlamada.
aıta ketelik respýblıkalyq bıýdjetten bólingen 207 mln teńge tıimsiz jumsalǵany jóninde jazǵan edik.