Jergilikti atqarýshy organdarǵa avtogaz quıý stantsııalarynyń shekti sanyn belgileý quqyǵy berilmek
ASTANA. KAZINFORM — Suıytylǵan munaı gazynyń baǵasyn bekitý ókilettigi Tabıǵı monopolııalardy retteý komıtetine berilýi múmkin. Bul týraly Májilistiń jalpy otyrysynda gazben jabdyqtaý jáne gazdy únemdi tutyný máseleleri boıynsha zań jobasyn tanystyrǵan depýtat Edil Jańbyrshın aıtty.
- Suıytylǵan munaı gazy naryǵynda búginniń ózinde qurylymdyq tapshylyq qalyptasyp otyr. 2025 jyldyń qorytyndysy boıynsha suıytylǵan munaı gazynyń naqty tutyný kólemi 2 mln tonnany, al óndirý kólemi 1,8 mln tonnany qurady, - dedi depýtat.
Onyń atap ótýinshe, salada kelesi baǵyttar rettelmegen:
- suıytylǵan munaı gazyn paıdalanatyn kóppáterli turǵyn úıler men áleýmettik nysandardyń qurylysy;
- avtogaz quıý stantsııalary sanynyń ósýi;
- óndirýshilerdiń josparly-aldyn alý jóndeý jumystarynyń úılestirilýi.
- Osy jaǵdaıdy turaqtandyrý maqsatynda suıytylǵan munaı gazyn paıdalanatyn kóppáterli turǵyn úıler men áleýmettik nysandardy jobalaý tapsyrmalaryn kelisý, sondaı-aq óndirýshilerdiń josparly-aldyn alý jumystarynyń kestelerin bekitý ókilettigin Energetıka mınıstrligine berý; jergilikti atqarýshy organdarǵa avtogaz quıý stantsııalarynyń shekti sanyn belgileý quqyǵyn berý usynylady, -dedi ol.
Edil Jańbyrshın kóppáterli turǵyn úıler men áleýmettik nysandardy jylytýǵa arnalǵan suıytylǵan munaı gazy baǵasynyń memlekettik rettelmeýi de ózekti másele bolyp otyrǵanyn aıtty.
- Jylytý maýsymynda gazdyń baǵasy bir tonnasyna 150–den 200 myń teńgeden 250–den 300 myń teńgege deıin ósedi. Baǵanyń negizsiz ósýine jol bermeý úshin kóppáterli turǵyn úıler men áleýmettik nysandardy jylytýǵa arnalǵan suıytylǵan munaı gazynyń baǵasyn bekitý ókilettigin Tabıǵı monopolııalardy retteý komıtetine berý usynylady, - dedi Edil Jańbyrshın.
Aıta keteıik, taýarlyq gazdy únemdep paıdalaný mádenıetin qalyptastyrýǵa, sondaı-aq jeke jáne kommýnaldyq tutynýshylar úshin saralanǵan tarıf saıasatyn qurýǵa baǵyttalǵan zań jobasyna qatysty Edil Jańbyrshın Kazinform tilshisine suhbat bergen edi.
