Jergilikti zaýyt Taraz dárihanalaryna táýligine 30 myń maska jetkizip turady
TARAZ. QazAqparat – Jambyl oblysy aýmaǵynda koronavırýs ınfektsııasy tirkelgen joq. Sanıtarlyq-epıdemıologııalyq jaǵdaı turaqty, dep habarlaıdy QazAqparat.
Búgin ÓKQ alańynda Jambyl oblysy taýarlar men kórsetiletin qyzmetterdiń sapasy men qaýipsizdigin baqylaý departamentiniń basshysy Berik Jarqynbekov Tótenshe jaǵdaı kezinde densaýlyq saqtaý salasyndaǵy profılaqtıkalyq jumystar týraly baıandady.
Spıkerdiń aıtýynsha, Jambyl oblysy aýmaǵynda koronavırýs ınfektsııasy tirkelgen joq. Sanıtarlyq-epıdemıologııalyq jaǵdaı turaqty. Medıtsınalyq uıymdar koronavırýstyq ınfektsııamen aýyratyn naýqastardy qabyldaýǵa jáne emdeýge daıyn. Barlyq medıtsınalyq uıymdarda medıtsına qyzmetkerleri úshin jeke qorǵaný quraldarynyń, dezınfektsııalyq preparattardyń, dárilik zattardyń qajetti qorynyń bolýy qamtamasyz etildi.
Al oblystyq densaýlyq saqtaý basqarmasynyń basshysy Marat Jumanqulov búginde dárihanalardaǵy maskalar men antıseptık tapshylyǵy týraly suraqqa jaýap berip, arnaıy qurylǵan mobıldi top qaladaǵy dárihanalardaǵy maska tapshylyǵyn jáne baǵa ózgerisin baqylap otyrǵanyn tilge tıek etti.
«Biz jergilikti «SýperFarm» zaýytymen kelisimge keldik, Tarazdaǵy dárihanalarǵa táýligine 30 myńnan astam betperde jetkizip turady. Biraq bir shekteý bar - ár adamǵa tek 5 maskadan ǵana satylady», – dedi ol.
Brıfıng kezinde karantınde jatqan azamattar boıynsha da málimdeme jasaldy.
«Bir ushaqta otyrǵan 2 adam anyqtaldy, biraq olar birden karantınge jatqyzyldy», – dedi oblystyq taýarlar men kórsetiletin qyzmetterdiń sapasyn baqylaý departameniniń basshysy Berik Jarqynbekov. Ázirge naqty qaı kúni, qandaı reıste bolǵany belgisiz.
Marat Jumanqulovtyń sózinshe, oqshaýlaǵyshta jatqan adamdardy baqylaıtyn dárigerlerge qalaı jumys isteý kerektigi týraly túsindirý júrgizilgen. Zııandy ortada jumys istegenderi úshin olarǵa 2 aılyq jalaqy kóleminde eńbekaqy tólenbek.
