Jergilikti turǵyndar jańa mektep salýdy talap etýde
ASTANA. Qazannyń 28-i. QazAqparat - Parlament Májilisiniń depýtaty Uzaqqalı Eleýbaev QR Bilim jáne ǵylym mınıstri Baqytjan Jumaǵulov myrzanyń atyna depýtattyq saýal joldap, Atyraý oblysyndaǵy áleýmettik nysandardyń tapshylyǵyn málim etti.
«Bárimizge málim «2011-2013 jyldarǵa arnalǵan respýblıkalyq bıýdjet týraly» Qazaqstan Respýblıkasynyń Zańynyń jobasy bul kúnderde Parlamentte qaralýda. Zań joba Qazaqstan Respýblıkasynyń áleýmettik-ekonomıkalyq damýy men bıýdjettik ólshemderiniń boljamy jáne Qazaqstan Respýblıkasy Prezıdentiniń Qazaqstan halqyna jyl saıynǵy joldaýlarynyń negizinde ázirlengen. Deıturǵanmen de, Atyraý oblysynyń bilim ordalary men mektep jasyna deıingi balalar baqshasy nysandaryn salýǵa qarajat qarastyrylmaǵan»,- dedi U.Eleýbaev:
Májilis depýtatynyń aıtýynsha, búgingi tańda atalǵan óńirde kóptegen oqý oryndarynyń materıaldyq-tehnıkalyq bazasy men jáı-kúıi qazirgi zaman talabyna saı emes. Oblystyń Jyloı, Qyzylqoǵa, Inder aýdandaryndaǵy, sonymen qatar qalaǵa jaqyn ornalasqan kenterdegi mektepterde balalar sanynyń shamadan tys kóptiginen áli kúnge deıin úsh aýysymda oqý jalǵasýda.
«Bul jaǵdaıdan Bilim jáne ǵylym mınıstrligi de habardar. Bilim berý júıeleriniń osyndaı halde bolýy balalarǵa qolaısyzdyq jaǵdaı týǵyzýda. Sol sebepten jergilikti turǵyndar jańa mektep salýdy talap etýde»,- dedi depýtat.
Qajetti smetalyq-jobalyq qujattar men usynystar oblys ákimshiligi tarapynan mınıstrlikke tapsyrylǵan. Sol sııaqty Atyraý oblysynda balabaqshalary qurylysyn 6 jerde bastaýǵa bolatyny jóninde tıisti qujattar da mınıstrlikke tapsyrylǵan.
Depýtat mınıstrden Atyraý oblysynyń jaǵdaıyn eskerip, aldaǵy 2011 jylǵa 4 mektep pen 6 balabaqshanyń qurylysyna qarajat bólgizýge yqpal etýin ótingen.
Depýtat U.Eleýbaevtyń saýalyn qoldap, áriptesteri A. Bekenov, B. Qonarbaı qoldaryn qoıǵan.
