Jergilikti taýaróndirýshilerdi nazardan tys qaldyrmaýymyz kerek - Tımýr Qulybaev
Oblys ákimi Janseıit Túımebaev pen Óńirlik palata basshylyǵy jáne memlekettik organdar men bıznes ókilderiniń qatysýymen ótken jıynda Prezıdıýmynyń tóraǵasy «Atameken» UKP-nyń jumysynyń negizgi nátıjeleri týraly egjeı-tegjeıli toqtaldy, dep habarlaıdy QazAqparat tilshisi.
Máselen, 2013-2017 jyldar arasynda bıznesti qorǵaý salasynda UKP-na 22 myńnan astam shaǵymdar kelip túsken, onyń 40 paıyzy bıznestiń paıdasyna sheshilgen. Nátıjesinde 92 mıllıard teńgeden asa kásipkerlerdiń menshik quqyǵy qorǵalǵan. Munan bólek, Tımýr Qulybaev jastardy kásipkerlikke mektep jasynan beıimdeý qajet ekenin aıtyp, búginde Bilim jáne ǵylym mınıstrligimen birlese joǵary synyp oqýshylary úshin arnaıy pán engiziletinin málim etti. Bul demografııalyq ósimi joǵary ońtústik úshin óte tıimdi ekenin jetkizdi. Jıynda sonymen qatar Maqtaral men Saryaǵash aýdandarynda «Atamekenniń» kásipkerlikti qoldaý ortalyqtaryn ashý kerektigi, osy ortalyqtar arqyly jurtty bızneske úıretý jaıy sóz boldy. Jıynda sonymen qatar Ózbekstan men ońtústik arasyndaǵy saýda-sattyqty damytý jaıy talqylanyp, bul rette jergilikti kásipkerlerge qoldaý jaıy aıtyldy.
«Ózbekstanmen saýda- sattyqtyń damyp, taýar aınalym artqany qýantady, árıne. Biraq bul jerde oılanatyn máseleler bar. Ásirese, jergilikti taýaróndirýshilerdiń jaǵdaıyn nazardan tys qaldyrmaýymyz kerek. Búgin oblys ákimi Janseıit Túımebaevpen osy másele jaıynda sóılesip, arnaıy jumys tobyn quratyn boldyq. Aımaqtyq damý kartasyn qarap, kásipkerlerge taýarlardy saqtaý men satý boıynsha qandaı usynystar aıta alatynymyzdy pysyqtaımyz»,- dedi QR «Atameken» Ulttyq kásipkerler palatasy Prezıdıýmynyń tóraǵasy Tımýr Qulybaev.
Bıznez ókilderimen bolǵan basqosýda oblys ákimi Janseıit Túımebaev talqylanatyn máselelerdiń ózektiligine toqtalyp, kúngeı óńir úshin kásipkerlerdiń ekonomıkamyzǵa qosar úlesi zor ekenin aıtty.
«Prezıdentimiz Nursultan Ábishuly Nazarbaev aımaqtyq kásipkerlikti damytý máselesin árdaıym basty nazarda ustaıdy. Ákimshilik kedergilerdi joıý, bıznesti júrgizý boıynsha protsedýralardy jeńildetý Elbasymyzdyń áleýmettik-ekonomıkalyq bastamalaryn qoldaýdyń negizgi qaǵıdalaryna jatady. Búgingi tańda Ońtústik Qazaqstan oblysynda qolaıly bıznes klımat qalyptastyrýǵa jáne shaǵyn jáne orta kásipkerlikti damytýǵa barynsha jaǵdaılar jasalynǵan. 2017 jyly ónerkásip óniminiń kólemi 858,4 mlrd teńgege jetip, ósim 102,1 paıyzdy qurady. Al óndeý ónerkásibiniń jyldyq ósimi 105 paıyzǵa jetti. Bul kórsetkishterge oblysymyz Elbasymyzdyń tikeleı tapsyrmasy boıynsha jańa óndiristerdiń ashylýy men jumys jasap jatqan kásiporyndardy jańǵyrtý arqasynda qol jetkizildi. Sondaı-aq óńdeý ónerkásibiniń negizgi kapıtalyna 129,4 mlrd teńge ınvestıtsııa salynǵan, bul 2016 jylmen salystyrǵanda 2,4 esege ósip otyr. Bul kórsetkish boıynsha respýblıkada 1 oryndamyz»,-dedi Janseıit Túımebaev.
Jalpy oblysta qolaıly bıznes klımat qalyptastyrýǵa, shaǵyn jáne orta kásipkerlikti damytýǵa barynsha jaǵdaılar jasalýda. Atap aıtqanda 2017 jyly «Bıznestiń jol kartasy 2020» baǵdarlamasymen 499 jobaǵa qoldaý kórsetilse, «Nátıjeli jumyspen qamtý jáne jappaı kásipkerlikti damytý 2017-2021 jyldarǵa arnalǵan baǵdarlamasynyń» ekinshi baǵyty aıasynda 911 kásipkerge 4,1 mlrd teńge kóleminde shaǵyn nesıe berildi. Al «Bastaý bıznes» jobasy boıynsha 1 500 adam oqýdan ótken, onyń ishinde 300 adam óz kásibin bastady. Óńirlik qarjy ınstıtýttary bolyp tabylatyn Aımaqtyq ınvestıtsııalyq ortalyq «Ońtústik» jáne «YRYS» MQU arqyly 2017 jyly 8,3 mlrd teńgege 2 342 jobaǵa qarjylaı qoldaý kórsetip, nátıjesinde 4 618 jańa jumys oryndary quryldy. 