Jergilikti polıtsııany oblys ákimi taǵaıyndaıtyn bolady
ASTANA. QazAqparat - "Qazaqstan Respýblıkasynyń keıbir zańnamalyq aktilerine jergilikti polıtsııa qyzmetiniń jumysy boıynsha ózgerister men tolyqtyrýlar engizý týraly" Zań jobasyna saı, jergilikti polıtsııa jetekshisin sol oblystyń ákimi taǵaıyndaıtyn bolady. Bul týraly búgin Ortalyq kommýnıkatsııalar qyzmetinde ótken brıfıng barysynda QR Ishki ister mınıstrligi Ákimshilik polıtsııa komıtetiniń tóraǵasy Igor Lepeha málim etti.
"Zań jobasyndaǵy bir jańalyq - 2016 jyldyń 1 qańtarynda qujat kúshine engen soń, jergilikti polıtsııanyń jetekshisi men onyń orynbasaryn Ishki ister mınıstrligimen jáne oblystyq máslıhatpen kelise otyryp, oblys ákimi taǵaıyndaıdy. Osylaısha, ákim óz óńirindegi tártiptiń saqtalaýyn qamtamasyz etetin tetikti kóbeıtedi jáne de jergilikti polıtsııa jumysy úshin ákimniń jaýapkershiligi artady", - dep habarlady I.Lepeha.
Aıta keteıik, osy jyldyń mamyr aıynda ótken Úkimettiń keńeıtilgen otyrysynda Memleket basshysy halyqqa esep beretin jergilikti polıtsııa organyn qurýdy tapsyrǵan bolatyn. Osy tapsyrmany oryndaý úshin Ishki ister mınıstrligi "Qazaqstan Respýblıkasynyń keıbir zańnamalyq aktilerine jergidikti polıtsııa qyzmetiniń jumysy boıynsha ózgerister men tolyqtyrýlar engizý týraly" Zań jobasyn ázirlegen bolatyn. Zań 2016 jyldyń 1 qańtarynan kúshine enedi.
