Jergilikti polıtsııa qyzmetiniń quzyreti zańmen aıqyndalady

ASTANA. QazAqparat - Jergilikti polıtsııa qyzmeti jergilikti atqarýshy organǵa esepti bolady. Qoldanystaǵy zańdarǵa osyndaı túzetýler engiziledi. Naqtyraq aıtqanda, osy kúnderi «Qazaqstan Respýblıkasynyń keıbir zańnamalyq aktilerine jergilikti polıtsııa qyzmetiniń jumysy máseleleri boıynsha ózgerister men tolyqtyrýlar engizý týraly» zań jobasyn Májilis depýtattary talqylaý ústinde.

Bul zań jobasy Elbasy usynǵan Ult jospary - bes ınstıtýtsıonaldyq reformany iske asyrý jónindegi 100 naqty qadamnyń 30 jáne 31-qadamdaryn oryndaý úshin ázirlengen.

Sol sııaqty zań jobasynda Qazaqstan Respýblıkasynyń Іshki ister mınıstrligi jáne aýmaqtyq ishki ister organdary janyndaǵy Qoǵamdyq keńesterdiń qyzmeti polıtsııa qyzmeti jumysynyń ashyqtyǵyna jáne azamattardyń senimdilik deńgeıin arttyrýǵa yqpal etetini atap kórsetilgen.

Jergilikti polıtsııa qyzmetiniń quzyretine quqyq buzýshylyqtardyń profılaktıkasy, qoǵamdyq tártipti saqtaý, qylmystyq quqyq buzýshylyqtardyń aldyn alý jáne jolyn kesý, ákimshilik quqyq buzýshylyq ister boıynsha is júrgizý, qylmystyq teris qylyqtar boıynsha hattamalyq nysanda sotqa deıingi tergep-tekserý jatqyzylatyn bolady. Jumys tobynyń jetekshisi, depýtat Qaıyrbek Súleımenov bul zań jobasynyń jergilikti jerdegi polıtsııa qyzmetkerleri úshin mańyzdylyǵyn atap ótti.

Osy zań jobasy arqyly Ákimshilik quqyq buzýshylyq týraly kodekske jáne alty zańǵa túzetýler engizilip otyr.