Jergilikti ózin-ózi basqarýdyń derbes bıýdjeti tolyq qashan engiziledi

ASTANA. QazAqparat - 2020 jyldyń 1 qańtarynan  barlyq jerde jergilikti ózin-ózi basqarýdyń derbes bıýdjeti engiziledi. Bul týraly búgin Úkimet otyrysynda QR Ulttyq ekonomıka mınıstri Tımýr Súleımenov málim etti, dep habarlaıdy QazAqparat.

«100 naqty qadam» - Ult josparynyń 98-qadamy aıasynda aýdandyq mańyzy bar qala, aýyl, kent, aýyldyq okrýg deńgeıinde jergilikti ózin-ózi basqarýdyń derbes bıýdjeti men kommýnaldyq menshigin engizýdi kózdeıtin jergilikti ózin-ózi basqarýdy damytý máseleleri boıynsha Zań qabyldandy. Jergilikti ózin-ózi basqarý bıýdjeti 2018 jylǵy 1 qańtardan bastap halyq sany 2 myń adamnan asatyn 1062 aýyldyq okrýgte engizildi, al 2020 jylǵy 1 qańtardan bastap barlyq jerde engiziletin bolady», - dep atap ótti mınıstr.

Onyń aıtýynsha, derbes bıýdjetti engizý aýyldyq okrýgterdiń qarjylyq múmkindikterin keńeıtýge jáne salyqtardy tikeleı óz bıýdjetine alýy arqyly jergilikti mańyzy bar máselelerdi sheshýde jergilikti ózin-ózi basqarýdyń rólin kúsheıtýge múmkindik berdi.

Aýyldyq okrýg bıýdjetine salyqtyq túsimderdiń 7 túri jáne basqa da salyqtyq emes túsimder, sondaı-aq shyǵystardyń 19 baǵyty berildi. 2018 jylǵa túzetilgen jergilikti ózin-ózi basqarý bıýdjetter kiristeriniń jospary 113,8 mlrd. teńgeni qurady.

«Zańdy is júzinde sapaly iske asyrý maqsatynda Jergilikti ózin-ózi basqarýdyń derbes bıýdjeti men kommýnaldyq menshigin engizý jónindegi is-sharalar jospary bekitildi. Josparǵa sáıkes aýyl ákimderi men olardyń apparattary qyzmetkerlerin oqytý, jergilikti ózin-ózi basqarýdyń derbes bıýdjeti men kommýnaldyq menshigin engizýge ýákiletti organdardyń aqparattyq júıeleri men derekter bazalarynyń daıyndyǵyn qamtamasyz etý, aýyl ákimderi apparattaryn ınternet baılanysymen jáne kompıýterlik jabdyqtarmen qamtamasyz etý boıynsha sharalar kózdelgen. Іs-sharalardyń kóbi oryndaldy», - dep baıandady Tımýr Súleımenov.