Jergilikti ózin-ózi basqarýdyń 2025 jylǵa deıingi tujyrymdamasy qabyldandy
«Memleket basshysy elimizde jergilikti ózin-ózi basqarýdyń tujyrymdasyn ázirleýdi tapsyrdy. Buǵan deıin elimizde jergilikti ózin-ózi basqarýdyń 2013-2020 jyldarǵa arnalǵan tujyrymdamasy iske asyryldy. Osy baǵyttaǵy jumysty odan ári jalǵastyrý úshin bıyl, 18 tamyzda 2021-2025 jyldarǵa arnalǵan jańa memlekettik tujyrymdama bekitilip, qabyldandy. Búginde biz ol tujyrymdamany iske asyrýǵa kirisip te kettik. Sonyń biri elimizde alǵash ret uıymdastyrylǵan aýyl ákimderiniń saılaýy. Bıyl mamyr aıynda tıisti zańǵa ózgeris engizilip, shilde de aýyl ákimi saılaýy ótti. Jalpy elimizde 2345 aýyldyq okrýg bar, bıyl 730 aýyl ákimi saılandy. Al qalǵan aýyldar boıynsha ákimderdiń qyzmettik merzimi aıaqtalǵan soń saılaý ótetin bolady», - dedi Mırjan Imanbaev.
Onyń aıtýynsha, 2025 jyldyń birinshi jartyjyldyǵyna deıin aýyl ákimderin tikeleı saılaý aıaqtalady.
«Sonymen qatar elimizde jergilikti ózin-ózi basqarý týraly jańa zań qabyldanady. Sebebi búginde memlekettik jáne jergilikti ózin-ózi basqarý týraly ortaq aýqymdy zań bar. Sonyń ishinen jergilikti ózin-ózi basqarýdy bólek shyǵaryp, jańa zańnama ázirlenbek. Búginde atalǵan zańnyń jobasy jazylyp jatyr. Ol zańnamanyń ishinde aýyl okrýgi apparatynyń qyzmeti, ondaǵy keńes jumysynyń mindeti men mańyzy naqty kórsetiletin bolady. Jospar boıynsha 2022 jyly qabyldanady», - deıdi ol.
Eske sala ketsek, bıyl shilde aıynda Memleket basshysy Qasym-Jomart Toqaev Reformalar jónindegi joǵary keńestiń kezekti otyrysyn ótkizdi.
Kún tártibinde qaralǵan máselelerdiń biri jergilikti ózin-ózi basqarýdy damytýdyń tujyrymdamasy. Óz kezeginde Prezıdent jergilikti ózin-ózi basqarýdyń tıimdi ınstıtýtyn qurýdy mańyzdy mindet retinde atady.
