Jergilikti ózin-ózi basqarý: Úkimet basshysy birqatar mınıstrlerge naqty tapsyrma berdi
ASTANA. QazAqparat - Búgin Úkimet otyrysynda Premer-Mınıstr Baqytjan Saǵyntaev jergilikti ózin-ózi basqarýdy damytýǵa oraı birqatar mınıstrlerge naqty tapsyrma júktedi, dep habarlaıdy QazAqparat tilshisi.
«Tujyrymdamaǵa sáıkes ózin-ózi basqarýdy damytýdyń birinshi kezeńi oryndaldy dep aıtýǵa bolady. Ony qazirgi aıtylǵan baıandamalardan kórip otyrmyz. Degenmen, osyǵan baılanysty Ulttyq ekonomıka mınıstrligine jergilikti ózin-ózi basqarýǵa turaqty monıtorıng pen taldaý júrgizýdi tapsyramyn»,- dedi Úkimet basshysy.
Sonymen qatar Premer-Mınıstr elimizdiń Qarjy mınıstrligi aýyldyq okrýgterdiń bıýdjetimen jumys isteý úshin aqparattyq júıelerdiń tolyqqandy jumys isteýin qamtamasyz etý boıynsha barlyq daıyndyq is-sharalaryn aıaqtaýy qajettigin basa aıtty.
«Dáýren Áskerbekuly (QR Aqparat jáne kommýnıkatsııalar mınıstri Abaev) Tımýr Muratulynyń (QR Ulttyq ekonomıka mınıstri Súleımenov) usynysy boıynsha tirkelý jumystarynda halyqqa berý jeńildik múmkinshiligin qarastyrýdy suraımyn. Meniń oıymsha bul durys usynys jáne de Tımýr Muratuly Qyrymbek Eleýulynyń da (Qyzylorda oblysynyń ákimi) usynystaryn qarańyzdar. Erbolat Asqarbekuly (Úkimet basshysynyń orynbasary) bul másele Sizdiń baqylaýyńyzda», - dedi Baqytjan Saǵyntaev.
Aıta keteıik, Úkimet otyrysynda jergilikti ózin-ózi basqarýdy engizý máseleleri jóninde baıandaǵan QR Ulttyq ekonomıka mınıstri Tımýr Súleımenov aýyl turǵyndaryna keıbir qyzmetterdi jeńildik sharttarymen rásimdeýge múmkindik berý qajettigin kótergen bolatyn.
