Jergilikti ózin-ózi basqarý organdarynyń róli kúsheıtilmek
Bul týraly Oralda «Qazaqstan Respýblıkasynyń keıbir zańnamalyq aktilerine jergilikti ózin-ózi basqarýdy damytý máseleleri boıynsha ózgerister men tolyqtyrýlar engizý týraly» Zań jobasy talqylanǵan kóshpeli keńeste aıtyldy.
Qazaqstannyń batys óńirindegi aýdandyq mańyzy bar qalalar, aýyl, kent jáne aýyldyq okrýgter ákimderi úshin uıymdastyrylǵan keńeste Batys Qazaqstan oblysy ákiminiń orynbasary Bıbigúl Qonysbaevanyń atap ótkenindeı, jergilikti ózin-ózi basqarý salasynda engiziletin ózgeristerdi talqylaý, atap aıtqanda, derbes bıýdjet pen kommýnaldyq menshikti engizý jergilikti ákimderdiń quqyqtyq saýattylyǵyn arttyryp, áleýetin nyǵaıtýǵa septesedi. «100 naqty qadam» Ult jospary aıasynda qaralyp otyrǵan zań jobasynda jergilikti ózin-ózi basqarýdy damytý arqyly azamattardy sheshimderdiń qabyldanýyna neǵurlym kóbirek qatystyrýǵa erekshe kóńil bólingen. Sonyń ishinde derbes bıýdjetti qalyptastyrýdyń mańyzy zor», dedi ol.
Jıynda QR Ulttyq ekonomıka mınıstrligi óńirlik saıasat, óńirlerdi taldaý jəne baǵalaý departamentiniń dırektory Jaıyq Sharabasov atalmysh zań jobasy jóninde áńgimelep berdi. Onyń aıtýynsha, Elbasy Jarlyǵymen 2012 jyly Qazaqstan Respýblıkasynda jergilikti ózin-ózi basqarýdy damytýdyń tujyrymdamasy bekitilgeni belgili. Soǵan sáıkes bul baǵyttaǵy jumys eki kezeńmen júzege asyrylýda. 2013-2014 jyldary basqarýdyń tómengi býyndarynda qazirgi júıe áleýetin keńeıtýge kúsh jumsalsa, 2015-2020 jyldar aralyǵynda, ıaǵnı ekinshi kezeńde eleýli ózgerister engizilmekshi. Bul rette halyqaralyq tájirıbe de eskeriledi. Mysaly, 2018 jyly eki myń turǵyny bar, 2020 jyly barlyq aýyldyq okrýgte jergilikti ózin-ózi basqarýdyń derbes bıýdjeti engiziledi. Bul bıýdjet salyq túsimderimen, aıyppuldarmen jáne aýdandyq bıýdjet transferti esebinen tolyǵatyn bolady. Jergilikti ózin-ózi basqarýdyń derbes bıýdjet shyǵysy on eki baǵytta jumsalady. Onyń qatarynda mektepke deıingi uıymdy materıaldyq turǵyda qamtamasyz etý, eldi mekenderdi abattandyrý, aýyz sý nysandarynyń jabdyqtaryn jáne avtojoldar qurylysyn júrgizý jáne kútip-ustaý engizilgen. Kommýnaldyq menshik tutqasy qolyna berilgen aýyl ákimshiligi qarajatty jergilikti qaýymdastyq ókilderiniń kelisimi arqyly jumsaıdy. Jalpy, zań jobasy jergilikti ózin-ózi basqarý organdarynyń ekonomıkalyq jáne qarjylyq múmkindigin keńeıtýge, sol arqyly jergilikti mańyzy bar máselelerdi sheshýge, oǵan turǵyndardyń yqpalyn kúsheıtýge baǵyttalǵan.
Keńeste sondaı-aq QR Ədilet mınıstrligi Zańnama ınstıtýtynyń jetekshi ǵylymı qyzmetkeri, zań ǵylymdarynyń kandıdaty Mereke Ǵabdýalıev zańǵa ózgerister men tolyqtyrýlar engizilgennen keıin túsinbestikter týyndamas úshin ony keńinen talqylap, barlyq usynys-pikirlerdi eskerip baryp, qabyldaýdyń, sonymen qatar túsinik jumystaryn aldyn ala júrgizýdiń qajettigin jetkizdi. Osy shara da sondaı maqsatty kózdeıdi.
Jıynda Batys Qazaqstan aýdandarymen qatar, Aqtóbe, Atyraý, Mańǵystaý oblystarynan kelgen jergilikti ákimder óz oılaryn ortaǵa salyp, is-tájirıbelerimen bólisti.
