Jergilikti ónim shyǵaratyn kásipkerlerdi árqashan qoldaımyz - Nurlybek Nálibaev
Oblys ákimi Nurlybek Nálibaev óńirdegi bıznes ókilderimen kezdesip, ortaq máselelerdi talqylady.
Basqosýǵa «Atameken» Ulttyq kásipkerler palatasy basqarma tóraǵasynyń orynbasary Tımýr Naqypbekov jáne oblys prokýrory Nurlan Bıjanov pen salalyq qurylym basshylary qatysty.
Jıynda otandyq ónim óndirý, azyq-túlik qoryn kóbeıtý jáne jergilikti taýaróndirýshilerdi qoldaý sharalary men óńdeý salalarynyń damýy ashyq aıtyldy.
Aımaq basshysy munaı qorynyń sarqylýyna baılanysty gaz óndirý isiniń kólemin arttyrýǵa basymdyq berilgenin, óndiris oryndarynyń janynan ilespe zaýyttar ashý arqyly jańa jumys oryndary qurylatynyn jetkizdi.
Sondaı-aq, ınvestıtsııa tartýǵa qolaıly jaǵdaı jasaý arqyly kásipkerlerdiń jańa jobalardy júzege asyrýǵa múmkindik mol ekenin qaperge saldy.
- Investorlardy qoldaý maqsatynda «Baıqońyr» áleýmettik kásipkerlik korporatsııasynyń róli kúsheıýde. Onyń quramynda «Qyzylorda ınvestıtsııalyq jáne taldaý ortalyǵyn» ashyp, ınvestıtsııa tartýǵa keń múmkindikteri men qyzmettik baılanystary bar iri kásipkerlerdi shaqyramyz. Aldaǵy ýaqytta agroónerkásiptik keshendi damytýǵa basymdyq beremiz. Bul baǵytta birinshi kezde aýyl sharýashylyǵynyń ónimdiligin arttyryp, agroónerkásip ónimderin óńdeý jáne eksport kólemin arttyrýdy qolǵa alamyz. Ónim óndirýge yntaly azamattardy qoldaımyz. Keler jyly eksportqa shyǵarylatyn tomat kontsentratyn óndiretin zaýyttyń qurylysyn bastaımyz. Al, ártaraptandyrý baǵytynda shet elderde suranysy kóp azyqtyq júgerini egý qolǵa alynady. «Aqjarma ı K» sharýashylyǵy SPK-men birlesip júgeri ósirýge qajetti tehnologııany engizýge ınvestor tartýda. Munan bólek, agro-ındýstrııalyq zonalar ashý josparymyzda bar,-dedi N.Nálibaev.
Kásipkerler palatasynyń usynysymen ótkizilgen jynda Tımýr Naqypbekov mundaı kezdesýlerdiń saladaǵy ózekti máselelerdi ashyq talqylaýǵa múmkindik beretinin atap ótti.
- «Atamekenniń» bastamasymen osyndaı kezdesýler barlyq oblysta uıymdastyrylyp jatyr. Qyzylorda toǵyzynshy óńir. Al kásipkerlik máselesimen aınalysatyn jumys tobyn quryp otyrǵan ázirge jalǵyz oblys. Jergilikti máselelerdi ákimdik sheship berse, respýblıkalyq deńgeıdegi problemalardy Úkimetke biz jetkizip otyratyn bolamyz», – dedi Atameken UKP Basqarma tóraǵasynyń orynbasary Tımýr Naqypbekov.
Keleli kezdesýde Nurlybek Nálibaev sheteldik kásipkerlerdiń tájirıbesi men ınnovatsııalaryn engizý isi bastalǵanyn tilge tıek etti.
Máselen, ýkraınalyq ınvestorlarmen tukym sharýashylyǵyn damyta otyryp kúrish, bıdaı, júgeri, soıa daqyldardyń jańa sorttaryn shyǵarýda yntymaqtastyq ornasa, avstralııalyq «Rýbıkon» kompanııasynyń sýdy paıdalaný tıimdiligi tájirıbesi qolǵa alynǵan.
Jıynda sóz alǵan oblystyq kásipkerlik jáne ónerkásip basqarmasynyń basshysy Musa Qaldarbekov kásipkerlerdi qoldaýda ártúrli kózderden 20 mlrd teńge shamasynda qarjy qaralyp, búginde 700-den astam jobaǵa jeńildikpen nesıe berilgenin aıtty.
Aýyldyq eldi mekenderdiń kásipkerleri úshin shaǵyn nesıe berý baǵytynda kásipkerlerdiń 393 jobasy 6,1 mlrd teńgemen qarjylandyrylǵan.
Basqosýda «Jan-Araı» JShS dırektory Baqdáýlet Mahashov kóterme-taratý ortalyǵynyń áleýetin joǵarylatý arqyly azyq-túlik ónimderiniń baǵasyn turaqtandyrý joldaryn usyndy.
Al, «Er-Áli» sharýa qojalyǵynyń tóraǵasy Álibı Bekjanov egin sharýashylyǵyn ártaraptandyrý týraly tájirıbesin bólisip, baqsha daqyldaryn kóbeıtýdiń jelisin jandandyrý máselesin kóterdi.
Oblys ákimi azyq-túlik ónimderiniń basym bóligin syrttan ákelý táýeldiliginen arylý úshin baqsha daqyldaryn egý isinde jergilikti kásipkerlerdi, yntaly bıznesmenderdi árdaıym qoldaıtynyn ashyq aıtty.
- Kókónisterdiń birazyn kórshi aımaqtardan alatynymyz jasyryn emes. Kartopty Pavlodardan, sábizdi Qostanaıdan ákelýdemiz. Qalǵany Túrkistan oblysynan keledi. Bul problemany joıý úshin egin egýge yntaly sharýalarǵa jer bólýdi tapsyryp, olarǵa jaǵdaı jasadyq. Baqsha ónimderin, kókónisti egýge bizdiń óńirdiń múmkindigi jetedi. Іsti ilgeriletip áketken sharýalar da bar. Kúrishke ǵana ıek artyp qoıýǵa bolmaıdy. Artylsa, ónimdi satýǵa múmkindikti de qarastyramyz,-dedi N.Nálibaev.
Sondaı-aq, birqatar kásipkerler jańa emhana ashý, bos turǵan ǵımarattardy kásipkerlik maqsatta paıdalaný, týrızmdi damytý, jeke balabaqshalarǵa sýbsıdııa bólý, jeńil ónerkásip salasyna jaǵdaı jasaý syndy ózekti máselelerin ortaǵa saldy.
Jıyn sońynda aımaq basshysy óńirde bıznes klımatty jaqsartý úshin kásipkerlerdiń usynystary men jobalaryn qaraıtyn arnaıy jumys toby qurylatynyn jetkizdi.
«Atameken» Ulttyq kásipkerler palatasy basqarma tóraǵasynyń orynbasary Tımýr Naqypbekov mundaı jumys toptyń alǵash bolyp Qyzylorda óńirinde bastaý alatyny qýantarlyq jaǵdaı dedi.
