Jergilikti máslıhat depýtattyǵynyń 1 ornyna 3 kandıdattan úmitker - QR OSK

ASTANA. QazAqparat - Jergilikti máslıhat depýtattyǵynyń 1 ornyna 3 kandıdat úmitker. Bul týraly búgin QR Ortalyq saılaý komıssııasynyń múshesi Marat Sársembaev málim etti.

" Qazaqstan Respýblıkasy máslıhattary depýtattarynyń kezekti saılaýyn ázirleý men ótkizý jónindegi negizgi is-sharalardyń kúntizbelik josparyna sáıkes 2016 jylǵy 23 aqpanda máslıhattar depýtattyǵyna kandıdattardy tirkeý aıaqtaldy. Okrýgtik saılaý komıssııalary barlyq deńgeıdegi máslıhattar depýtattyǵyna jalpy respýblıka boıyna 10825 kandıdatty tirkedi. Osylaısha, ortasha básekelestik 1 depýtattyq mandatqa 3 úmitkerdi quraıdy", - dedi M.Sársembaev.

Onyń atap ótýinshe, kandıdattardyń 1592-si - oblystyq máslıhattarǵa, 121-i - Astana qalasynyń máslıhatyna, 130-y - Almaty qalasynyń máslıhatyna tirkeldi. Aýdandyq máslıhattar depýtattarynyń mandattaryna 6862 kandıdat, al qalalyq máslıhattarǵa - 2120 kandıdat úmitker.

"Tirkelgen kandıdattardyń 3407-i saıası partııalardan, 17-i - qoǵamdyq birlestikterden, al 7401-i - ózin-ózi usynǵandar. 2012 jylǵy saılaýmen salystyrǵanda, tirkelgen kandıdattar sany 2016 jyly 1660 adamǵa kóbeıdi. 2012 jyly 9165, al 2016 jyly 10825 adamdy qurap otyr", - dedi OSK múshesi.